E le’i tamala Matagaluega o leoleo i lana vaega o le Community Engagement Unit, ina ua toe alia’e foi feeseeseaiga ile va o tamaiti aoga ile taulaga ma faia ai se fono a le pulega o leoleo ma puleaoga mai le Kolisi o Maluafou ma Leififi ananafi, Aso Lulu, 28 Fepuali, 2024.
O le leoleo sinia , Susuga Tuaena Paulo, na taitai le itu a Leoleo ma le Toe fuataina, ma faataua i lana talanoa, le mana’omia lava faia ni auala e puipuia ai le saogalemu o tamaiti aoga, aemaise o aoga tutupu ane ai fafitauli faapea.
Ua fautuaina malosi foi Superintendent Paulo, taitai o aoga nei e lua, ia fai vave lava se faatatau talafeagai ia filemu aoga.
Mai le lipoti a leoleo o ta’ua ai e le pule aoga o le Kolisi o Maluafou, Leatufale Lasi Tavae, o tamaiti uma lava e faamaonia sootaga i femisiaiga, ua tutuli motu lava ma le latou aoga.
Ma ia faafetai ile sao ole Matagaluega o leoleo.
O le ‘a fai foi le latou pito laau, o le puipuia mai lea o nisi feeseeseaiga e tutupu ile lumana’i.
Ae ile tali a le Pule aoga o Leififi, ile ofisa o leoleo, susuga a Sifuiva Malaea Lauano, ole faaletonu na amata mai ile aafiaga ole latou tamaititi aoga ile aso 23 o Fepuali 2024.
Ma ua tuli le tamaititi na faatupuina , ae ua galue ai i auala ole filemu ile va o kolisi.
Ua ose vaega lea o le galuega a leoleo mo se siosiomaga saogalemu i aoga, ae o talavou a Samoa.
E au uma lava ile galulue faatasi mose Samoa saogalemu.
