O le soifua pule esea i Samoa, sa tu matila ai le toatele o ona tagata, e maumau ai soifua, faatusa i isi atumotu o le Pasefika, ile silia i le 20 tausaga ua tuana’i.
O mafuaaga, lava mai lena taimi, lea lava e maitauina, pea, e aofia ai le va faaleulugalii, ole va faaleuo, ole fememea’i ole mafaufau, o aafiaga faaletagata mai siosiomaga o aso nei o soifua ai.
Ole toe alia’e ole soifua pule esea ile faaiuga o le vaiaso ma maumau ai le soifua ose alii talavou, 26 tausaga, mai le Itu o tane, Savaii, ua fesiligia ai le auaunaga a faalapotopotoga o gafa ma fesoasoani, mo tagata o iai aafiaga o ta’ua i luga.
Peita’i i faamaumauga a le Matagaleuga o leoleo, pei ona saunoa ai le Sui Komesina o le Matagaluega, ile masina faaiu ole tausaga 2022, Susuga Papalii Monalisa Tiai – Keti, le siitia ole aofai o soifua maumau ma le pule esea.
I faamaumagua o lena taimi, 2022 sa 28, faatusa i le 19 sa iai ile 2019. Ua lata ile 50 pasene le faatoateleina o tagata maliliu faafuasei, ile pule esea.
Ma ia faamanatu mai ai, o loo iai faalapotopotoga e fesoasoani ia te oe, Pei o le Faataua le Ola, 800-5433.
O lesi numera ua tele ina tauloto e le toatele, 800-7874 a le Toomaga mo e Puapuagatia, 24/7.
Ole maliu pule esea lea mai Savaii, ua lua ai soifua maumau i faalavelave tutupu faafuasei, ile faaiuga o le vaiaso, pei ona faamaonia e le Sui Komesina o le Matagaluega o leoleo, Susuga Papalii.
E aofia le tama 54 tausaga na aafia ise faalavelave tau taavale mai Siusega, ma taofia ai e leoleo le avetaavale, ose alii 40 tausaga, ua i lima o leoleo le mataupu.
