E to’a fitu pisikoa lea na faafeiloai aloa’ia i le aso e le Matagaluega o aoga, taaloga, ma aganuu e tauala mai i le faapa’aga a Samoa ma le Amepasa a Amerika i Samoa.
Faatoa toe aumaia lea o ni pisikoa i Samoa talu mai le 2020 ona o vaovao ma sa o le Koviti19, ae o le kulupu muamua foi lea na taunuu mai le po anapo, ma e lei mautu foi aoga ma afioaga e galulue ai.
Peitai saunoa le Minisita o Aoga Taaloga ma Aganuu, le afioga ia Seuula Ioane Tuā’au, o loo iai le fuafuaaga a le Matagaluega e tufatufa i tua i Nuu ma Afioaga pisikoa nei mo nai vaiaso e a’oa’o ai le Gagagna Samoa, feau faa Samoa ae o le Aganuu foi, ona faatoa mafai lea ona tuu atu i aoga ua mautu e galulue ai.
Ae o talia ai le isi 30 o pisikoa o loo faamoemoe e taunuu mai ia Iulai o le tausaga nei pei ona saunoa le Minisita, ma o le auga na talosaga ai le Matagaluega mo ni pisikoa sei fesoasoani i faiaoga o aoga i nuu i le a’oina o le faitau i le gagana faaperetania i totonu o aoga tulaga lua.
Saunoa foi le Minisita i le uma ane o le ava o le feiloaiga na faafeiloai ai le aumalaga, e tai lua tausaga o le konekarate ae mafai lava ona talosaga le pisikoa e toe faaopopo se isi tausaga pea sologa lelei le galuega.
