Ile afea ai o Samoa e le sui failautusi a le malo tele o Amerika, Wendy R Sherman. Ua ia faafetaia ai le afioga i le Palemia Fiame Naomi Mataafa, ile faatali matagofie mo ia. Aemaise o le taunuu mai ai ile masina muamua ua faatoa toe tatala ai feoaiga faalevaomalo a Samoa, talu le silia i le lua tausaga o tapunia ona o le covid 19.
Ma e fia momoli foi lana faamanuiaaga tele i le Afioga i le Palemia , i le vaaiga o lona atunuu mai le faamai na pisia ai le lalolagi atoa. Ma ose mitamitaga foi lea ia Amerika ile galuega faifaatasi ma Samoa, e ala i le tufa mai o tui e 45afe, e puipuia ai Samoa.
Ua lagona foi le agaga fiafia ile amata atu o lana faigamalaga ile tatou itulagi, mai Samoa, o loo tatou tuaoi, paaga malosi ae ose uo lelei. Ua lanutasia o tatou atunuu i lana faataua i faigamalo faatemokarasi, e aofia ai le aloaia o aia tatau a tagata, ole aloaia o le faaalia o lagona ma le saolotoga o tapuaiga lotu, poo le talitonuga male talitonu malosi ile taua ole saolotoga ma le tatala o faasalalauga.
O le la feiloaiga ma le Palemia na talanoa ai itu tau i le faapaaga a Amerika ma Samoa.
Ma lagolago malosi a lona atunuu ile faamalosi’au lea ile tutu faatasi o le fono a malo o le Pasefika. Ma faafetaia ai le latou valaaulia atu o le Sui Peresetene o Amerika, Harris, e fai mai sana saunoaga i luga fesootaiga televave ile fono a malo o le Pasefika i le masina talu ai. Ma ua tapena foi le Peresetene ole malo o Amerika e talimalo i taitai o malo o le Pasefika, ile masina fou o Setema,ile taimi o le fono tele a Malo Aufaatasi, UN.
Saunoa foi le Sui failautusi, a Amerika na la talanoa foi ile galulue faatasi ile puipuia lea o tagata o atumotu mai faamai pipisi pei o le koviti. O lesi mataupu, o le faapaaga ile va o Samoa ma le US Coast Guard, le vaega e puipuia le gataifale a Amerika, e vaai ane ma le saogalemu o tuaoi o Samoa mai fagotaga faasolitulafono, ae o aafiaga o le siosiomaga o ona atuvasa ma lona tamaoaiga.
Na faatalanoa foi, se sao o le faalapotopotoga o le Blue Pacific, lea na faato’a faalauiloa ua amata mea ai le malo o Amerika, Ausetalia, Iapani, Niusila ma Peretania ose faapaaga ma le Pasefika faatatau i aafiaga o suiga o le tau, ma le atinaeina o le tamaoaiga, ia faaaua ai pea ona saoloto le va fetausia’i ma le Pasfika. Na afea foi le taua o aoga, pei foi ole auai atu ose sui mai le Pasefika ile fono a taitai talavou. O le polokalame o lea O taitai talavou ile Pasefika, e avea ma sootaga i isi foi augatupulaga i luma atu, poo taitai ole malo o Amerika, taitai o le Pasefika, Niusila ma Ausetalia. Aua ua tatou iloa o le aoaoina lelei ma glulue faatasi, ole auala lelei lea ise lumanai sili atu mo le itulagi nei ae ole lalolagi.
Na folafola foi e le tamaitai sui failautusi o Amerika le toe foi mai o Pisikoa ise taimi lata mai. O loo tatala pe lona ofisa, ae talu ai le faamai tele, ua leai ai na ana volunteers. I totonu o le 55 tausaga ua tuana’i, ua silia i le 2afe Pisikoa Amerika na galulue fua i Samoa, ose faailoga tumatila lea o le faapaaga ma le faauo ile va o tagata o Amerika ma Samoa.
Ma o lea foi ua oo mai ia i Samoa, ma le tatou itulagi e faalogo ma ia iloa ai ona uso ma tuagane ile Pasefika. Ua tasi lava tatou ose aiga, i a tatou tu ma agaifanua, ua tatou faataua ma e mafaia mea uma pe o tatou tutu faatasi ose paaga.
Ma toe faafetaia ai Samoa i le tali faaaloalo ua lagona ai le mafanafana ole taunuu ai i fanua ole latou aumalaga, ma ia faaauau ai pea lenei mafutaga i le va o malo e lua. Na toe taliu ai lava le aumalaga i le uma ane ole lua itula na atofa mo Samoa, ae faasolo atu i isi atumotu ole tatou itulagi.
