E lima isi tausaga lea ua malie mai ai le pulega o le falemai ole Apollo i Initia e faapaaga ai ma Samoa, i ana gasegase tigaina e avatu mo togafitiga.
O lena maliega ua mae’a faapepa ma sainia ile va o le Sui Peresetene ole Apollo Radhey Mohan ma le Palemia o Samoa Afioga Fiame Naomi Mataafa, ma faalauiloa mai e le nusipepa a le malo le Savali.
Ua faamauina ai foi ile maliega lea o le’a mafai ona auina mai foma’i Initia, e galulue ai mo le Maota Gasegase i Samoa nei.
Fa’ailoa e le Afioga i le Minisitā o le Matāgaluega o le Soifua Mālōlōina iā Valasi Luapitoifanua To’ogāmaga Tafito Selesele i le Savali.
O le fa’aauau ai o lea faigāuō mafana, e le’o se feagaiga fou, ua leva ona fesoasoani le Falema’i a Apollo mai Initia, i le togafitia o nai o tatou tagata ua a’afia i gasegase ogaoga, a’o se fa’amāmā avega fo’i mo Samoa i le taugofie o lana auaunaga.
O lipotia e le pepa a le malo, e taugofie atu le falemai lea i Initia nai lo falema’i i Niusila, ae ose vaega foi lena ole saunoaga a le Minisita ole matagaluega, pei ona lipotia.
Ua lipotia foi le ono fausia ose lala ole Apollo i Fiti, mo lenei itulagi i lumana’i, peita’i ua taatia atu ai ma le valaaulia ile pulega o le falemai a Samoa, e asiasi atu ia silafia ai le faatinoga o latou galuega.
O le toe faaopopo ole lima tausaga ole faapaaga, ua ose avanoa foi mo isi gasegase o loo ave auaua’i mo togafitiga i fafo, pei ona faalauiloa mai e le pepa a le malo.
