Toe faafoi mai le alii Samoa ina ua solitulafono

SHARE NOW

Taofia i le tuaoi o Ausetalia se alo o Samoa, ma toe faafoi mai i Samoa, i le solia ai o le ai-aina 8577, i lalo o le visa 403, mo galuega faavaitaimi i Ausetalia.

Ua faamalosia nei e le matagaluega o tuaoi a le malo o Ausetalia (Australia Border Force), le su’esu’e, auiliili ai, e tusa ma le faatanaga faa le tulafono, i lalo o le faitauga 116, o le tulafono o femalagaina a le malo o Ausetalia (section 116 of the Migration Act), e FAA LE AOGAINA ai se visa (cancellation of a visa) ausetalia, ua solia ona aiaiga pei ona i ai le 8577.

O le aso Toonai, 13 o Ianuari 2024, na toe taliu atu ai i Ausetalia se alo o Samoa, o loo i ai lona visa 403, e tolu tausaga, na maua i lalo o galuega faavaitaimi, e mafai ai ona faigaluega le gaaluega na sponsor ina lona visa i Ausetalia.

O visa e tai tolu tausaga le umi,  e mafai ona:

1. ulufale ma faigaluega i Ausetalia, i lalo o galuega faavaitaimi, i le nã o le fale faigaluega lava na lagolagoina (sponsor) maia lona avanoa,

2. e le mafai ona faigaluega i se isi lava galuega i Ausetalia, seia vagana ua toe faataga atu e le ofisa o femalagaina.

O le aiaiga o le tulafono 8577, e saisaitia ai le aluese, o se tagata na ulufale atu i lea visa, e mafai ai ona toe faa faigaluega, e se isi lava fale faigaluega i Ausetalia.

Ua tele faaseã mai fale faigaluega i totonu o Ausetalia, ua faaoo i le ofisa o femalagaina a le Immigration a Ausetalia, ona o le toatele o alo ma fanau a Samoa ma le pasefika, e autovaa atu i visa o galuega faavaitaimi,

1. ma sosola,
2. pe faamalolo ona o amioga matagã ua soli ai le tulafono,
3. poo ua o atu foi tau aiga o nei fanau, ma ave ese mai i apitaga sa nonofo saogalemu ai, ma le polomisi e maua a latou galuega i tua o le komiuniti.

Peitai, o le toatele ua o i tua ma latou apitaga, e le mafai ona faigaluega, ona o le saisaitiaga o loo i ai i luga o le visa 403, e tapu ai le mafai ona toe faa faigaluega.

O se tasi lea o faafitauli tele i alo ma fanau e sao atu i galuega faavaitaimi i Ausetalia, lea ua amatalia ai nei ona faia gaioiga faamalosia (enfocement actions), a le matagaluega, e puipuia tuaoi o le malo o Ausetalia, e faaleaoga ai visa, ma toe faafoi mai i Samoa ma atunuu o le Pasefika, i latou uma na ofi atu i galuega faavaitaimi, ae ua solia tulafono o latou visa.

O le alo o Samoa na maua i le tuaoi o Ausetalia ma suesue ai, e faapea, toe tasi le tausaga uma le aoga o lona visa, na maua i lalo o galuega faavaitaimi, peitai na tutuli ese nisi o latou e le fale faigaluega o loo sponsor ina o latou visa, ma toe maua ai lana galuega i se kamupani kamuta.

O lea alo o Samoa na malaga mai e fai Aso fiafia i ona matua ma aiga i Samoa, ae o le toe foi atu ai i Ausetalia, ae maua ai loa i le tuao, faa le aogaina ai le visa, ma toe faafoi mai ai lava i Samoa.

E tusa ai ma tulafono fa‘avae o Femalagaina o le 1958, a le malo o Ausetalia, soo se tasi e faaleaogaina lona visa, e tolu tausaga e le mafai ai ona toe ulufale i totonu o Ausetalia, ma le tausaga faaopopo, e fa a’i tausaga, e le toe mafai, ona apalai ai i se visa malaga atu i Ausetalia.

Famauina le to’atele o nisi o fanau a Samoa ma le pasefika, o le a faasagasaga i ai sailiga fai faatasi a le ofisa o le immigration a Ausetalia, ma le matagaluega e vaaia le tuaoi o malo a Ausetalia, ua solia tulafono o latou visa, ina ia toe faafoi mai i Samoa.