Ua toe talosagaina mai e le Matagaluega o le Soifua Maloloina le mamalu o Matua, aiga ma Samoa atoa, ina ia fai tui puipui o le misela mo alo ma fanau laiti i lalo ifo o le 5 tausaga le matutua e le’i faia tui puipui o le Misela, Mami ma le Rupela.
Ua afua lea faasilasilaga faalauaitele, e tauala mai i se pepa o faamatalaga ina ua fa’ailoa e Niu Sila le fa’amaonia o le iai o nisi ua a’afia i le Misela i totonu o le latou atunu’u ma o lo’o fa’atinoina le galuega a le latou Ofisa o le Soifua Maloloina ina ia taofiofi le pepesi o le fa’ama’i.
Peitai o le popolega o le Matagaluega o le Soifua Maloloina nei toe oo mai nei faamai pei ona taua i luga i totonu o le atunuu, ma faigofie ai loa ona aafia alo ma fanau iti e lei faia tui puipui.
Ae ua faamanino mai e le pepa lava lea o faamatalaga e tatau ona atoa tui puipui e lua o le Misela, Mami ma le Rupela o alo ma fanau laiti e puipuia ai i latou mai le misela i le 9 masina ma le 15 masina le matutua.
Ua tuuina faatasi mai lenei faasilasilaga ma se taulogologo a le Matagluega i matua e leo mautinoa ua maea ona faatino tui puipui a o latou alo, ina ia agai i le falemai faaitumalo poo soo se falemai ata ane e faia ai le tui.
O le Misela o se fa’ama’i e pipisi ma e faigofie ona feave’aia e le ea pe a tale ma mafatua le tagata ua a’afia.
E maualuga le avanoa e a’afia ai le tagata e le’i faia sona tui puipui o le misela aemaise pe a e latalata ma nofo fa’atasi ma le tagata ua a’afia.
Ae o āuga ma foliga va’aia o le Misela e aofia ai le fiva, mātūtū le tale, mūmū pe fulafula mata, tafe le isu, mafatua so’o, pata le ulu ma fa’asolo atu le tino atoa, vaivai ma gagase tino, lē manogi se fiaai.
O le aunagi a le Matagaluega ina ina faia tui puipui o alo ma fanau laiti ina ia faasaoina mai ai mai faamai pipisi o le Misela, Mami ma le Rupela.
