Na sainia i le faaiuga o le vaiaso na tea nei se tino i tupe e tusa ma le $43, 980, 581.99, ua ofo mai e le malo o Iapani e fausia ai se Fale Fogafale 3 mo le Fa’atufugaga o le Saienisi a le Iunivesite Aoao o Samoa.
O lenei tauofoga sa fa’ailoa e le Minisita o le Va i fafo le susuga ia Yoko Kamikawa i le la feiloaiga ma le Palemia o Samoa le afioga ia Fiame Naomi Mataafa ma le faauluuluga o le Iunivesite le susuga ia Patila Amosa.
Peitai ua saunoa le Palemia o Samoa, i nei lava fuafuaga o le fausia o lenei fale, ua fa’ailoa ai le fausia ai fo’i o se fale maimoa i totonu o le lotoa e tusa ma le 300 nofoa, 5 potu mo a’oga fa’aopoopo, potu mo su’esu’e faasaienisi, ma le potu mo faia’oga.
O lenei poloketi o lo’o galulue fa’atasi ai malo e lua mo le si’itia o ‘au’aunaga aua fanau o lo’o ua a’otauina i le Iunivresite.
Ma o le tasi lenei o alafua o loo i totonu o le faiga paaga a malo e lua, o le ave o le faamuamua i le itu tau aoaoga e pei ona faailoa e le Malo tele o Iapani.
E ese mai lea faamanuiaga ua tauaao e le Univesite, i le isi foi ofo a le Malo o Niusila sa tuuina ai e le sui Palemia se vaega tupe aua le amataina o se tasi o faailoga maualuga i le mataupu lava o le faa Saienisi.