O le vaiaso nei lea ua usu ai le fono tele i Malua.
Ina ua uma atu polokalame e masani ona ave iai le faamuamua, e aofia ai le fono a Komiti o Feau Eseese, Komiti Autoeiina, Komiti Atina’e, Komiti o Tupe, Komiti a tina ole Ekalesia poo faletua o faafeagaiga male faauuga o faifeau faai’uaso na taualuga iai le vaiaso muamua o le fono faaletausaga.
Ua faamauina e 19 faifeau fou, ua avea ai nei ma faifeau faauu, ua agavaa ona latou faia sauniga faapitoa pei o le faamanatuga, o maliu ma faaipoipoga.
I le uma ai ma le manuia o le fa tausaga o a’o’oga ile Tusi Paia, ae o lu’itau ole avea ai ma a’oa’o ma faasolo ane ai ina avea ma faifeau faauuina.
Ole fono tele lea a le EFKS i Malua, sa masani ona usu ta’i tausaga, ile masina o Me, e saili avanoa mai ai malaga a vaalele, usugafono mai Niusila ma Ausetalia, faapea Amerika.
Peita’i na tolo ona o vavao ma tapu o le faamai tele, Covid19. O Me ole 2019 lea na gata mai ai le Fonotele i Malua, ina ua pesi le Misela sosoo ane ia ma le Covid19 na pesia ai le lalolagi atoa.
O lesi lea taimi faatau mo le au fai pisinisi, pe’a oo ina usu fono a Ekalesia, Ole EFKS lea o loo tumau lava le toatele atu o ona tagata lotu, i le tatou atunuu.
