Ua amata ai nei ona mata’itu e tagata palota o le Itumalo o Gagaifomauga numera lua po’o ai se ole a sui tulaga i le afioga a Vaele Paiaua Iona lea na tauavea mai le tofi o le itumalo seia tuumalo, i le mavae ai ole tausaga e tasi o lana nofoaiga muamua.
E tuua ai le malo e le Susuga a Vaele ae ua amata ona faataatia ana komiti galue, mole faagaioinao le miliona tala a lona itumalo.
Na ia saunoa ise tasi tatou faatalanoaga ao soifua, o loo tilotilo e faagaioi mai lalo i Safune le ofisa mo le amata ai o atinae, ma vaavaai ai ile agai i lumana’i.
O ana komiti mai afioaga e le’i faigata lava foi ona fili, aemaise ai o le afioaga o Samauga e le atoa se 40 o ana palota na maua atu ai, ae sa ave ai lana faataua i tagata uma lava o le itumalo, ina ia tofu tofusia uma ma atinae e manuia ai ile poloketi miliona tala pei ona momoo.
Na ia folafola foi le faia ose auala taavale fou e soo atu ai Lefagaoalii i Paia, e suia ai le auala savali 10 minute o iai nei ile va lea.
O lesi ona manaoga, o taatia ai o le toe faafoi ane o eleele galue o le itumalo, i Ologogo, sa iai le pa povi a le Esetete Tausi a Samoa, ua taaloa uma na povi ma sa molia ma falepuipui ai nisi o tagata palota o le itumalo i le faatamaia o povi a le malo i tausaga ua tuanai.
Ma le siitia o le falema’i o loo agai iai lona itumalo. Ole falemai faaitumalo i Safotu o loo tuli uma e Itumalo e fa e aofia ai Gagaemauga, Gagaifomauga 1, 2 ma le tolu.
Ae o auala i aiga o nuu aemaise o le suavai, e lei oo lava le paipa ile tele o aiga ole itumalo o mao uta nofoaga.
E oo mai nei, ua maitauina lava le sua matamuli o isi matai iloga oloo fia tauva, peita’i ua amata ona iai suafa, ma o le’a faailoa atu i tatou tala oi luma.
