Ua leai se avetaavale a le Minisita ole matagalega o Faamasinoga, Afioga a Matamua Vasati Pulufana.
Ina ua faamavae faafuasei lana ave taavale, Susuga Laufika Loli.
O Laufika Loli ua toe foi ai nei e faigaluega i le ofisa o leoleo. O lana galuega lena sa iai, a’o lei faamavae faamalosi e le pulega talu ai ole Matagaluega o leoleo.
Peita’i i tatou sailiga na iloa ai, ole faaiuga o le vaiaso talu ai na faato’a faailoa ai e le avetaavale a le afioga i le Minisita , lona faasee atu i le ofisa o leoleo.
Ae o aga masani ai, e ta’i lua vaiaso e tatau ona avatu ai se tala ile pulega, ae su’e se tasi e galue ile avanoa.
Peita’i i le faalauiloa a le Afioga ile Komesina o leoleo Auapaa Logoitino Filipo o le aso 7 o Tesema 2022, ua iai le tatou kopi, ua toe valaau ai Laufika Loli i lona tofiga lava na faamavae faamalosi o ia umia, e leoleo Satini, ma le alii leoleo ia Pauna Ofisa as a Constable.
Ua ave iai le lua vaiaso e toe faamasani ai ile galuega.
Ua tuu atu foi i le alii Satini ia Laufika le lua tausaga e galue ai faavaavaaia, Ma ia taumamao mai ile soliina ose tulafono ile taimi o loo galue vaavaaia ai. A maua o aafia ise soligatulafono, ma faamaonia, ua faate’a loa lava.
O le alii leoleo Satini ia Laufika sa faamavae mai le Matagaluega o leoleo ma galue i le LTA, ma faasolo ane ai e avetaavale i le Minisita o Faamasinoga, ma toe faafaigaluega atu ai ile Ofisa o leoleo.
O aga masani ai e le Matagaluega, o se leoleo e faamavae, afai e toe fia foi atu i le galuega, e toe alu lava ile faasologa , pei foi ona faia i isi leoleo . Peita’i , o le susuga a Laufika ua galue ai ile ofisa o leoleo mo le lua vaiaso faamasani ma toe maua lava lona tofiga na iai, a’o lei faamalosia e faamavae.
O le susuga Laufika o le a galue i le vaega o taavale afi,
Ae o Constable Pauna e galue i le vaega a le Auaunaga Lautele a leoleo. O le aso 23 Tesema e amata ai ona galulue le toalua lea i a la vaega, ile uma ai ole lua vaiaso ua toe faamasani ai ile matagaluega.
