Tala toe tuliloa, mai le afioaga o Salelavalu i Savaii ma le toga marijuana, na osofai e leoleo , ile Aso Toonai talu ai.
Na toe tuliloa lava e leoleo ma matai o le Afioga le togalaau i le talaloa a Salelavalu. Peita’i e oo atu le siaki a le nuu ma leoleo ua toe o tagutu o laau marijuana, o loo totoe mai ile vaega ole togavao na fai ai le togalaau.
Na malaga faatasi ai ma leoleo atu i Upolu nei e aofia ai ma le afioga i le Komesina ole matagaluega.
Peita’i ole togalaau lea na o atu leoleo ma le nuu, ua uma ona aveese, ua faia iai suesuega i lona taunuuga.
E le’o iloa foi e leoleo se tele na iai talu e lei mafai ona oo iai ile aso Toonai lea na salalau ane ai pulu o le fana 12 ma aafia ai leoleo e toalua, ma toe solomuli ai loa le osofaiga.
O lesi togalaau lea na ati ane e leoleo i le Aso Toonai lava lea talu ai, sa maua ile aai o le nuu, i Salelavalu tai.
Ae o le molimau mai ile afioaga lea , ua mama mai gauta ile togavao, e leai nisi togalaau na mafai ona iloa e le mea pueata faalele a leoleo.
Peita’i ua taofia ai pea e leoleo alii e toatolu o tuuaia, ma molia ai i le toto laau faasaina ma le taumafai o lesi e faaoo le maliu.
O Apisaloma Setu poo Sula , ua molia i le taumafai e faaoo le maliu , ae o Masina Lega Taulelei ma Manuia Lafaele ua molia ile toto o laau.
Ma e ono iai nisi moliaga faaopopo. Peitai ua uma ona faia faaiuga a le fono o le afioaga ile Aso Gafua na faasala ai alii o loo tuuaia.
O le osofaiga a leoleo i le Aso Toonai , ole tali atu i le galuega fai faatasi , ile tuuititia o fualaau faasa i Samoa.
Ina ua logo ane e tagata o le nuu i leoleo i Tuasivi le togalaau i gauta ma le aai o Salelavalu. Ma o loo taofia ai nei e leoleo le toa tolu lea ua maua uma ma ua faatulaga e tula’i ai i luma o le faamasinoga i le aso 28 o le masina nei.
