Talu ona tatala tuaoi faalevaomalo ia Aukuso 2022, e tusa ma le 120afe tagata malaga na uia le malaevaalele i Faleolo, i le faatusa a le Ofisa Sili o le Pulega o Malaevalele ia Silimani Ueta Jr. Solomona.
O lipotia e le pepa a le malo, Savali, ua faitau miliona tala tupe sau i totonu mai tagata tafafao mai, talu ona loka tuaoi ona ole misela ma le faama’i tele Covid19. Talu ona tatala tuaoi, ua faapena foi ona tatala le malaevaalele fitu aso i le vaiaso, ma vaalele taunuu, o tagata toe foi mai, ma aiga asiasi mai.
Mai le mea sa iai, i le na’o le lua vaalele , o lesi e mo uta, ae o lesi mo tagata toe foi, taimi nei ua 21 malaga i le vaiaso. Talu mai Novema o le 2022, o loo 12 lava malaga a le Air NZ ile vaiaso mai Aukilani, a le Boeing 787 ma le Airbus 321. Fiji Airways, e fitu ana malaga ile vaiaso ma lana malaga e tasi i Honolulu, lana vaa o le Boeing 737 Max. 21 malaga i le vaiaso, mo le tusa o le 120afe tagata malaga.
Ae lua malaga a le Qantas i le vaiaso i Ausetalia. O na malaga a vaalele tusa o le 25pasene o galuega faatino i Faleolo, 2 pasene o malaga private ma malaga togipau.
Ae o le 73pasene o galuega i le malae vaalele i lea aso ma lea aso, o malaga a vaalele i le va o Samoa e lua o lo o iai le Samoa Airways ma le Talofa Airways.
Ae o loo faaauau pea feutanaiga ma le Virgin Air mo le toe foi mai, peita’i ole masina o Mati o loo tau iai e toe faaauau ai le la faapaaga ma Samoa.
