Ua amata ai nei ona pisi le ofisa o faiga palota a Samoa i Mulinuu, e tapena le lesitalaga atoa tagata palota agavaa a Samoa mo lana palota tele o le 2026.
Peita’i o suiga ua pasia, e mo le lesitalaina o suafa o tagata palota, ae faatoa atoatoa ona mae’a lau lesitala oe lea le sitiseni Samoa o loo alala i fafo, pe a afio mai e pu’e ata o ou tamatama’ilima uma.
O lesi vaega ole suiga fou ua pasia, o le mafai ai ona lesitala o le tagata sitiseni Samoa oi fafo i luga o le lola palota, ona pule lea o oe pe ete fia palota mai i le palota tele a Samoa pe ete palota lava ile atunuu o loo e nofo mau ai, pe afai ete sitiseni ai foi, pei o Niusila, Ausetalia ma Amerika.
Faatusa ile tulafono tuai i faigapalota 2019, sa nao tagata a Samoa sa o e aooga, ma, vaega faigaluega faavaitaimi ma tagata faigaluega i Ofisa o Samoa i fafo, sa agavaa ona lesitala mai fafo.
O le amata atu ai loa o galuega a le ofisa palota , o ta’ua e le Komesina o faigapalota, Tuiafelolo Alexander John Stanley e oo atu ia Iuni 2025, ua mautu lola mo itumalo.
E silia i le 100 le aufaigaluega e aofia ai ma le silia i le 50 ole latou aufaigaluega tumau, ua atofa mole faamoemoe, i lona talitonuga, o loo lava ma totoe le taimi .
O le pu’eina o ata o tamatamailima o tagatanuu palota, ole laasaga lea, ua fautuina ai ele Matai palota mai Faleata, Susuga a Falefata, afai o lo o faaaoga e le Malo o Amerika ana masini e pu’e ai ata o tamailima o tagata eseese a talosaga atu i ana visa asiasi, e mafai foi ona faaaoga ofisa amupsa o Samoa i atunuu i fafo, faatotoga i masini faapena , e pu’e ai ata o tamailima o ana tagatanuu.
Nai lo le uma ona lesitala mai online, ae sau i Samoa e pu’e ai ata o tamailima faato’a agavaa ai e palota.
Peita’i o le suiga fou ua pasia e le palemene i le vaiaso talu ai, o le’a mauauala ai foi ona aveese uma suafa o tagata maliliu o loo iai lava iluga o lola a itumalo.
