Toe tasi le tausaga ma masina e valu oloo totoe ole nofoaiga muamua a le faigamalo a le FAST.
Peita’i ua faasolosolo malie mai lava ana fuafuaga alualu mamao, mo le atinaeina o Samoa, ose vaega o lana anavatau.
Pei ona molimauina ai le tulafono o faigapalota ma ona teuteuga lea ua laasaga mai.
Ole tulafono teuteu o fanua ma suafa, ma le faavae o Samoa, i ona laasaga lea ua faatalanoa ai nei i lona faitauga faalua ile palemene.
Peita’i ua amata ai foi fuafuaga mo se maota gasegase tele mo Savaii.
Pei ona ta’u e le Minisita ole Matagaluega ole Soifua Maloloina, Valasi Togamaga Tafito ile Observer le sologa lelei ole faamoemoe mo le falema’i i Salelologa, ma ua iai foi paaga oloo mananao mai i lena atina’e.
O taua e le pepa, ole nofoaga na ulua’i fuafua mo le falemai, e le talafeagai, ona e susu ma lalata ile sami, ma ua faamauina ai e le malo le 20 eka i laudanum lata ile maketi fou o iai nei.
Taimi nei, oloo avea le falema’i ole Malietoa Tanumafili ll i Tuasivi ma falema’i autu ole motu tele, e ese mai falema’i faaitumalo i Safotu, Sataua, Foailalo na Satupa’itea.
O gasegase e le gafatia ona togafiti i falema’i faaitumalo o Savaii, e faasee ile falema’i autu i Tuasivi, ma faasolo atu ai ile Tupua Tamasese Meaole i Apia.
