E tolu tausaga lea ua toe tofia ai nei e le Kapeneta le Afioga iā Lematua Gisa Fuata’i – Purcell na te ta’ita’ia ai le Ofisa o le Pulega Fa’atonu.
Ma o lana paeaiga lona lua lenei tai tolu tausaga.
I le mae’a o iloiloga a le Komiti Fa’apitoa na feagai ma fa’atalanoaga ma le iloiloina o lea avanoa, ma tu’uina atu ai le fautuaga i le laulauāfono a le Kapeneta, ma fa’amaonia ai i lana Fonotaga i lenei vaiaso, le toe fa’aauau o lea tamāli’i o le atunu’u i le tofiga o le Pule Fa’atonu mo le Ofisa o le Pulega Fa’atonu a Samoa.
O Lematua, ua lava lona silafia, ma ua loa fo’i lona malamalama i le fa’atinoga o lea auaunaga, ma o lo’o ia umia fa’ailoga tauāloa o le Masters in Commerce and Administration mai le Iunivesite a Vitoria i Uelinitone, Niu Sila i le 2003,
e aofia ai ma le Post Graduate Diploma in Information Systems Management.
O le 1973 na i’u mai ai ana a’oa’oga mai le Kolisi o Samoa, sa tautua fo’i i le Komiti Fa’afailautusi a le Natioanal I.C.T. Sector mo le ono tausaga, ae fa’apea fo’i i le Matāgaluega o Feso’otā’iga ma Fa’amatalaga Televavave Fa’aneionapo (M.C.I.T.) i le tofiga o le Ofisa Sili Lagolago o Pulega.
E 11 tausaga sa auauna ai i Fa’alapotopotoga Fa’avāomālō e aofia ai;
- Fa’auluuluga o Vaega tau Polōketi mo le International Telecommunication Organization, I.T.U. i Geneva, Switzerland i le 2009 i le 2016.
- Avea ma Faufautua Fa’aitulagi i le Pasefika, i le Fa’alapotopotoga o Feso’otā’iga Fa’aneionapo a Mālō o le Taupulega, i totonu o Peretania Tele mai le 2016 i le 2018.
- O le 2018 se’ia o’o mai i le taimi nei, o lo’o avea o ia ma Fa’atonu o le Atina’e Tau Feso’otā’iga, i le Fa’alapotopotoga o Feso’otā’iga Fa’aneionapo a Mālō o le Taupulega i Peretania Tele.
- Sui Failautusi Aoao o le Fa’alapotopotoga o Feso’otā’iga Fa’aneionapo a Mālō o le Taupulega i Peretania Tele, mai lava i le 2018 se’ia o’o mai i le asō.
