E toatolu faipule ole nofoaiaga o iai nei, ua fai ma sui o le Palemene a Samoa, ile fono a sui o Palemene o Malo o le Taupulega, o loo usu ai i Kanata ile vaiaso nei.
E lua vaiaso ua toesea ai faipule ia mai o latou itumalo, ma le atunuu. E aofia ai le Susuga a Ale Vena Ale o le itumalo o Faleata 4. O le fono lea i Kanata sa tatau ona auai atu iai le afioga ile Fofoga Fetalai ia Li’o Papalii Tae’u Masipa’u.
Peita’i na ia faamaonia mai ina ua tatou fesiligia, “o Ale o loo alu e fai ma o’u sui ile fono a sui o Palemene o malo o le Taupulega o faia i Kanata.”
O le tofiga o faipule e auai atu i fono i fafo, ole matafaiaoi lea a le Afioga i le Fofoga Fetalai. Ole vaiaso talu ai na faagasegasea ai le afioga i le Fofoga fetalai, peita’i na ia saunoa ile taeao nei ua fasolo ina manuia, mo le fonotaga a le Palemene.
Ole fono ua atofa mo le Aso Lua 23 Aukuso. I lana tali mai ile tatou fesili mo mataupu atofa, “o le ‘a faafofoga lava iai pe’a oo atu iai.”
Peita’i o loo talia le atunuu ise taunuuga ole Tofiga Ao o le Malo, lea na toe faaopopo sina taimi o le afioga Tuimalealiifano Vaaleto’a Sualauvi ll, ina ua uma lona lima tausaga muamua i le tofiga Ao.
O le fono a le Palemene o le Vaiaso nei, o le’a le auai atu foi iai le faipule o le Itumalo o Lefaga ma Faleseela, Susuga Masinalupe Makesi Pisi, male faipule tamaitai ia Fagaesealii Sapoa Feagiai of Aleipata Itupa-i-Lalo.
Talu o lo o malaga faatasi atu ma le Susuga a Ale Vena Ale ile fonotaga lea a sui o Palemene o faia Kanata.
