Ua faaiugafonoina ma faamauina le tofia ai e le Kapeneta o le afioga ia Sagauga Leilani Galuvao e avea ma Ofisa Sili o le Pulega o Fela’uaiga i luga o le Eleele (LTA) mo le isi tolu tausaga.
E toa lima i le ua tofia nei i latou na tusi talosaga i le tofiga lea a le malo ua faamanuiaina ai Sagauga.
Ua faauu mai le Univesite o Aukilani Niusila ma le faailoga o le Bachelor i le Saienisi.
O ona agavaa ma lona silafia e sootaga lelei ma lea tofiga ua afua ai ona filiflia e taitaia lea foi Pulega a le malo.
Ma o se talaaga mataina foi le soifuaga o lenei tina ina ua toe faaauau mai ai le galuega a lona tuagane le susuga ia Tuiletufuga Leasi John Galuvao sa avea ma ofisa sili muamua lava o le LTA mai le tausaga e 2009.
Sosoo mai ai le taitaiaga a le afioga ia Galumalemana Taatiaoleitiiti Tutuvanu i le 2018, seia oo ina faamavae i le tausaga ua mavae ona o nisi o fuafuaga faale aiga.
