Mai ise pepa o faamatalaga mai ile itulau a le lakapi Samoa ua faalauiloa mai le tofia ai lea ole afioga ia Matamua Upati Junior Salima e avea ma Faiaoga Ulu fou o le au taitoafitu a le Manu Samoa, a o lumanai ai le taamilosaga taitoa 7 a le Oceania ia Tesema 2024.
O lea tofiga na fa’amaonia mai e le Pule Sili o le Lakapi Samoa, Faleomavaega Vincent Fepuleai, ina ua mae’a ona filifilia. O Matamua na filifilia mai se vaega o sui tauva mai le lotoifale ma faavaomalo.
O lana ta’aloga i le ta’amilosaga ta’ito’afitu a le Oceania, o le a toe iloilo pe a mae’a le ta’amilosaga e fa’ailoa ai le lumana’i o le ‘au ma le polokalame o le ta’ito’afitu a le atunu’u.
Na fa’aalia e Matamua lona agaga fiafia, ile mafai lea ona tofia o ia e ta’ita’ia le Manu Samoa 7 ma na ia faailoa foi o le a ia faia le mea silisili e fesoasoani ai i le ‘au ia manuia lenei ta’amilosaga ma agava’a ai i le World Sevens Challenger Series i le 2025.
O Matamua ose Faia’oga ua loa lona tautua I taaloga faavaomalo ma ua iai foi le poto masani I galuega faapea ole avea ma taitai poo faaululuga o ni au.
Sa ia faiaoga muamua i le Tama Samoa 7s (I lalo ifo o le 18 tausaga) ma le Tama Uli 7s, ma taitai atu ai Tama Uli i le tele o manumalo, e aofia ai ma siamupini sosoo e tolu i le Vodafone Samoa National Sevens Series mai le 2017 i le 2019.
Sa ia faiaoga foi i le Kolisi a le Ekalesia. o le ‘au a Vaiola i lalo o le 18 tausaga i le suega siamupini a a’oga a le atunu’u i le 2024.
I le avea ai o Matamua ma Ofisa o Atina’e mo le Lakapi Samoa, sa fesoasoani tele Matamua i le sailiga o tama ta’a’alo talenia, aemaise lava mai Savai’i, o le to’atele o i latou ua aga’i atu e fai ma sui o Samoa i tulaga fa’avaomalo.
O Matamua e mai Salelologa, Tapueleele, Vaiola, ma Falealupo, ua faaipoipo ma e to’afa lana fanau.
O lona tofiga ua va’aia o se avanoa fou lea mo le Manu Samoa 7 ona o lo latou fa’amoemoe ia toe faaleleia ma tulei I luga taumafaiga a le au e pei ona iai I tausaga ua mavae atu.
