Ua faamaonia e le Kapeneta i lana fonotaga o le Aso Lulu, 28 Iuni 2023, le faaiuga a le Komiti sa faatalanoaina le avanoa o le Ofisa Sili o le Faletupe o Atinae, ma tofia ai Muā’autau Raiē Silipa e avea ma Ofisa Sili fou mo le isi tolu tausaga.
Ua sui tulaga le afioga a Muā’autau i le susuga a Faiane Susana Laulu, lea e lei toe tusi talosaga mo lenei avanoa. E toafa sa faatalatalanoaina i le filifiliga o le Ofisa Sili.
Peitai ile maea ane o le iloiloga ma mautinoa ai loa le susuga ia Muaautau mo lea foi tofiga.
Ua silia i le 20 tausaga o faigaluega lenei tamalii i le Faletupe o Atinae. E tofia nei o ia o loo avea ma Pule o le Vaega o Tupe a le Faletupe o Atinae.
O le afioga a Muā’autau o le sui o le Sosaiete Tausi Tusi a Samoa ma o loo ia umiaina le faailoga maualuga o le Masters i le Faatautaiga o Pisinisi mai i le Iunivesite o South Queensland i Ausetalia ma le Bachelor of Arts mai i le USP i Fiti.
