Ole vaiaso nei lea na faalauiloa ai e le kapeneta le tofiaina ole uluai ofisa sili mo le Matagaluega o Taaloga ma Faafiafiaga o tagata ae le gata ai lea ma le toe tofiaina ai ole pule sili ole Faalapotopotoga o Eleele a Samoa talu ona mae’a le isi ana konekarate mo le 3 tausaga.
Ole pule sili o taaloga Luatua Semiperive Epati ole ulua’i Ofisa sili lea na te ta’ita’ia le Matagaluega fou o Taaloga ma Faafiafiaga o tagata.
E 27 tausaga o galue le afioga ia Luatua ile faafoeina lea o taaloga a’o avea ma Pule Sili lagolago ile Matagaluega o Aoga, Taaloga ma Aganuu ao lei vavae ese mai le Matagaluega o Taaloga mai ile Matagaluega o Aoga ma Aganuu lea ua iai ile taimi nei.
Ole afioga ia Luatua oloo ia umia le tusipasi tau Bachelor in Physical Education and Sports mai le Iunivesite o Jiwaji e faavae i totonu o Initia.
Na filifilia Luatua mai le toa 8 na talosaga mo lea tofiga.
Ae ole afioga ia Ulugia Petelo Kavesi o lea ua toe faaauau le toe tofia ai lea o ia e le Kapeneta e avea ma Ofisa Sili ma Pule Sili ole Faalapotopotoga o Eleele a Samoa (SLC) mo le isi 3 tausaga.
O lea tofiga ua faia nei ona ose Matagaluega fou o Eleele ma Fuagafanua oloo faatuina nei ma mataupu ole lesitalaina o fanua ua see atu nei ai mai le Matagaluega o Punaoa Faalenatura ma le Siosiomaga, ile Faalapotopotoga o Eleele a Samoa.
O Ulugia oloo umia le Masters of Arts in Development Studies mai le Iunivesite ole Pasefika i Saute, Laucala Campus na faau’u foi ma le Masters of Business Administration, (MBA) ile 2007.
O Ulugia na amata lana galuega tautua lautele mo le 28 tausaga ose Fesoasoani Suesue ile USP Alafua Campus mulimuli ane tofia o ia e avea ma Manager Research & Statistics ile Samoa Tourism Authority, Administration Manager ma le Accident Compensation Board, ile mae’a ai lea ona tofia ai lea o ia e avea ma Pule Sili SLC talu mai lava le tausaga 2016.
