Ua faamaonia e le Kapeneta i lana fonotaga i le asō le fautuaga a le Komiti na iloiloina talosaga, le to tofia o le afioga i a Seuseu Dr. Joseph Tauati i le tofiga o le Ofisa Sili o Pulega mo le Matāgaluega o Fa’ato’aga ma Faigāfaiva (M.A.F.) mo le isi tolu tausaga.
Sa amata le tautua a Seuseu i le Matagaluega o Faatoaga i le 2002 o se alii Ofisa mo le Vaega e Puipuia Oloa Feaveai mai Faamai ma Iniseti Faalafuā i le Matagaluega o Faatoaga, ma faasolosolo ai ina siitia lona tulaga i le galuega. O le 2011 na se’e atu ai e galue i le Fa’alapotopotoga o Su’esu’ega Fa’asaienisi a Samoa (S.R.O.S.) o se alii Su’esu’e Sinia, ma i’u ai ina filifilia e avea ma Ofisa Sili o Pulega mo le SROS i le 2017 seia oo mai i le taimi nei.
O se tamalii ua maualuga le aoaoina i tomai ma agavaa aemaise lona silafia lautele i tulaga tau i le atinae o fa’ato’aga, faigāfaiva ma lafumanu, ma suesuega tau faatoaga mo le siitia o lenei vaega maoti o le tamaoaiga.
O lo’o umia e Seuseu Fa’ailoga Tikeri i Tulaga Tau Faatoaga mai le Iunivesite o le Pasefika i Saute, Faailoga o le Matua o Faiva i tulaga tau Suesuega o Punoa Faasaienisi mai le Iunivesite a Kochi i Iāpani ma le Faailoga Maualuga o le Fomai Tofamanino (PhD) i tulaga tau Molecular Biology ma le Phytopathology mai le Iunivesite o Bristol i Peretania.
Ua sui tulaga Seuseu i le afioga i a Tilafono David Hunter sa tauaveina lenei tofiga mo le ono tausaga taluai.
E le’i toe tusi talosaga Tilafono i le avanoa.
