15 Ianuari, Samoa – Ua tamua ai itumalo e tolu mai Savaii, i sainiga lima ole poloketi o atinae o itumalo, mo lenei tausaga galue ua amatalia.
Ole sainigalima na faia ile Aso Gafua 13 o Ianuari ile Tooa Salamasina i Sogi,
Ma faailoa faalauaitele mai i luga o le itulau a le Matagaluega, o Tina ma Tamaitai ma Agafesoota’i. O itumalo e aofia ai:
- Faasaleleaga 1
2. Faasaleleaga 4
3. Vaisigano 1
O Itumalo nei e tolu mai le motu tele i Salafai, ua taimua mo le faamatuuina atu o Vaega Tupe o le Miliona Lona Tolu (TF2024-2025) mo le fa’aauauina o atinae a Itumalo.
I le maea ai o iloiloga o ripoti a suetusi i le fa’aaogaina o le $1,000,000 (TF2023-2024) mo atinae a itumalo, ua pasia aloaia ai e le Komiti Faafoe a le Poloketi o Atinae Itumalo i lana fonotaga i le Aso,13 Tesema 2024, le faamatu’uina o le 1 Miliona Tala Lona Tolu e amata atu i le $160,000 poo le 16 pasene mo le fa’agaioina o Ofisa o Fono Faavae a Itumalo.
Ua maea pasia foi e le Komiti Faafoe ia Taiala o Atinae a nisi o nei Itumalo ma o lea faapea foi ona faamatuuina ia vaega tupe $540,000.00 mo le faatinoina o poloketi o atinae ma faamuamua a Itumalo.
E tusa lea ma le 70 % poo le $700,000.00 vaega tupe atoa o lea faamatuuina i le vaega muamua ua aofia ai ma le vaega tupe mo le faagaioiina o le Ofisa Fono Faavae.
I le maea ai o le faaogaina o vaega tupe muamua ($540,000), ona tuuina mai lea e Fono Faavae Itumalo ia ripoti o le faaogaina o nei vaega tupe (acquittal report 1st tranche) mo le faamaoniga a le Komiti Faafoe o Atinae Itumalo. Ona faamatuuina ai lea o vaega tupe lona lua ($300,000) e atoa ai le 1 Miliona Tala e faamaea ai atinae a Itumalo. O le maea ai o le faaogaina o vaega tupe atoa 1Miliona Tala, ona tuuina mai lea e Fono Faavae Itumalo ia le ripoti a le suetusi (Audit Report) mo le faamaoniga a le Komiti Faafoe o Atinae Itumalo, ma agavaa ai loa Itumalo e saini isi maliega tau tupe (Funding Agreement FY2025-2026) o vaega mulimuli e atoa iai le $5 Miliona o lenei paeaiga.
Ua toe 6 masina o le savaliga o lenei tausaga faaletupe o loo totoe (TF2024-2025) ma o le taimi faatapulaa foi lena mo faagasoloina o le Poloketi o Atinae Ituamlo.
E tāua ai tele le galulue faatasi o Fono Faavae Itumalo ma le Matagaluega aua le sologa lelei o atinae ma ia usitaia taimi faatulagaina.
O afioga i Taitaifono, Sui Taitaifono ma Failautusi o le Komiti o Fono Faavae, sa fai ma sui o Komiti o Fono Faavae i lenei sainigalima.