E toe lua vaiaso ona aulia loa lea o le 61 tausaga o le tu toatasi o Samoa, ile aso muamua o le masina fou o Iuni. Ae ua faamaonia mai e le taitai fono o le Soa Komiti o Faafiafiaga, le susuga ia Tanuvasa Petone Mauga, e na o le tolu lava faafiafiaaga lautogia e faafiafia mo lea aso.
E faia lea pea maea le sauniga lotu faalemalo, ona sosoo lea ma savali faaaloalo a aoga, ekalesia, fale faigaluega, faalapotopotga ma sosaiete.
Ae o le aoauli ile itula e tasi, e tatala aloaia pesepesega e le faafiafiaga faa le aganuu a Palauli #2 mai Savaii, ona sosoo lea ma le faafiafiaga a le afioaga o Samusu mai le Itumalo o Aleipata itupa i lalo.
Ole tauāluga i le pese fa’aleaganu’u a le Itumālō o‘Āiga i le Tai, ma ua tusi ‘ā’ao le Itumālō i le nu’u o Mulifanua latou te momoliina lo latou sao mo lea fa’amoemoe tāua.
Peitai, saunoa le afioga ia Tanuvasa o le aso Tofi ma le aso Faraile o le vaiaso nei o lea agai atu ai i tua le Komiti e pasia faafiafiaga a itumalo ua lautogia, mataitu poo talafeaga tapenaga ae avatu ai se tuualalo ma se fautuaga i se tulaga o lea maituaina o loo faaletonu ao lei oo i lea aso tele.
O le asiasiga mulimuli a le komiti o le aso 29 o le masina lenei o Me, o le naunautaiga ia mautinoa ua lava tapena afioaga ua valaaulia mo faafifiaga faapitoa aua le maimoaaga a le atunuu ma le mamalu o le au valaaaulia ae o tagata mai isi atunuu olea molimauina le aso fanau o le Atunuu.
