Ua sisii lima o tama matutua ole Manu Samoa faasaga ile pulega poo se vaega ole laulau a le Lakapi Samoa oloo iai nei, lea e taitaifono ai le sa avea ma Palemia o Samoa Tuilaepa Sailele Malielegaoi,
Talu ua opea ai nei ile lalolagi le faasalalauga a Tuilaepa e ala i lana tusi, ile lē gafatia ai e le Lakapi Samoa ole pulega ole Manu Samoa o lana ta’amilosaga masani ile faaiuga ole tausaga, ona ole leai ose tupe.
Peita’i lea ua ta’u e tamalii ole atunuu sa taumafaia mai le au i o latou foi taimi, afioga a Toleafoa Andy Aiolupo, ma le afioga a Aumua To’o Vaega, ile Blue TV Sports talanoa, ile po anapo, ua tatau ai nei ona fa’asee ese le pulega Lakapi Samoa o iai nei, e aofia ai ma le taitaifono.
O ananafi na tatou lipotia ai le saunoaga mai le Minisita o Taaloga, Laumatiamanu Ringo Purcell, e leai se talosaga faapitoa na avatu e le Lakapi Samoa mo se tupe ole taamilosaga lea a le Manu Samoa, peita’i e iai le talosaga na tuai ona avatu, mo le tupe faasoa ole 2023 – 2024, na manao atu ai e avane atoa se $1.5miliona e faatino ai o latou manaoga, na teena lena talosaga.
Peita’i ile tali mai e le Minisita o tupe, Lautimuia Afoa Uelese Vaai ile ATA – MUS, e leai foi se talosaga faapitoa na avatu mo le faamoemoe lea ile taamilosaga a le Manu Samoa masani ai, peita’i o tuaia e le Minisita le pulega ole Manu ile nofoa’i aua o fuafuaga faapea e tatau ona taatia se latou kalena 12 masina e iloa ai faagaioi aluga o taaloga a le Manu Samoa.
