Ua patipatia e tina ma tamaitai o le Sosaiete o le Tufa le Taleni, galuega ma faiva alofilima na o latou gaosia i le uma ane o le lua vaiaso o aoaoga.
O lenei Sosaiete sa faavaeina lava e tina o loo iai le taleni o le gaosia lea o soo se ituaiga mea taulima i le aso 22 o Novema o le tausaga 2021.
Ma o nei mea taulima ua mafai ona latou faatau atu ma maketi atu i atunuu i fafo ma maua ai foi le seleni aua le tausia ina o aiga ma fanau aoga.
Pei ona saunoa le Peresitene o lenei Sosaiete le susuga ia Flora Tautai Sinila mai le Afega, o le auga ma le faamoemoe o lenei Sosaiete.
Ia resitala uma o tina ma tamaitai o loo fai le fatu-aiga i nuu i tua ma soo se afioaga ona faia lea o aoaoga mo le lua vaiaso.
Na maea ifo le lua vaiaso sa faia ai lenei aoaoga ua sili atu le tomai o tina ma tamaitai sa o latou aoaoina e ala i le gaosiaina o le sei, ato lau fala, tuiga, elei ma le suisui ina o laei Samoa.
Taua e le peresitene o lona talitonuga o le isi lea mafuaga o le sauaaina o tina ma tamaitaia i totonu o aiga, o tulaga tau tamaoaiga ma le lava le seleni e faamalie ina ai le manaoga.
O le mau a tina ma tamaitai e silia ma le toa 30 na auai i le faamoemoe i le aso, i le uma ane ona tufatufa o latou tusiupasi o lea leai se isi mea e toe popole ai e ono maua ia le seleni.
O lea galulue punoiai loa e faaleleia atili le tomai ua maua mai nei aoaoga ma sue loa se auala e maketi atu ai i fafo nei oloa, mo le manuia o aiga, nuu ma Ekalesia.
Peitai e leo iai se faalapotopotoga poo se Matagaluega po se isi lava Aosisi o fesoasoani i lenei Sosaiete o loo faatupe lava e latou a latou galuega ma aoaoina i latou lava.
