Ua faamatuu atu nei e le Matagaluega o aoga, taaloga ma aganuu silipi poo ‘iuga o suega aoao a le vasega 12 ma le vasega 13, 2023 i puleaoga o aoga uma.
O suega nei o lea mafai ai ona iloa le faitau aofai o alo ma fanau o lea mafai ona maua avanoa i le UPY a le Iunivesite, ma fanau o le vasega 12 o lea ausia maka mo le vasega 13 o le tausaga nei.
O iuga foi o suega nei e faaoga mo le uluai resitala o fanau o lea filifili e aotauina i le Iunivesite Aoao o Samoa poo le USP ma nisi o aoga maualuluga, o matata eseese ua filifili e sootaga lelei ma le tomai ma maka ua maua mai i iuga o a latou suega.
O le aso la lea sa faasalalau faalauaitele mai ai e le Matagaluega o aoga taaloga ma aganuu e tatau ona oo uma atu ai uluaoga uma ile Ofisa o aoga i Malifa mo le pikiina o iuga o suega aoao a alo ma fanau.
Ma ua iai foi Kolisi ua tuu sao mai luga o upega tafailagi faasilasilaga i matua ina ia faaavanoa atu fanau i le aso Lua o le vaiaso nei poo le aso a taeao lea mo le tuu aloaia iai o iuga o a latou suega mai o latou lava faleaoga.
