I le usuia ai ole fono a le Palemene i le taeao o le aso, Aso Lua 26 o Aperila i lona maota i Tiafau Mulinuu.
Na pasia ai i lona faitauga muamua. O se tulafono e teuteu ai le Tulafono o Sootaga Va Lelei o Leipa ma Galuega2013 (“Tulafono autu”) ina ia:
(a) ogatasi ai tulafono o leipa ma tulaga faataatitia faava o malo o leipa;
(e) faamanino atili ai aiaiga ma tuutuuga o galuega;
(i) faamanino ai matafaioi a tagata asiasi o leipa;
(o) aiaia ai mo le faaleleia o le tulaga o le faagasologa o faasea ma faitioga; ma
(u) mo faamoemoega e fesootai i ai.
Ua tuu le avanoa i faipule e faitau ai a latou tulafono ao lei faia iai ni a latou saunoaga.
O le feiloaiga foi a le Palemene i le aso, na aloaia ai le tuua o le malo e le faipule o le Itumalo o Gagaifomauga ll, Vaele Paiaaua Iona Sekuini, ma avanoa ai le nofoa o le itumalo ile Maota.
Na aloaia foi le tuua o le malo e le afioga a Patu Siaosi Hunt ile masina ua tuana’i. Sa avea ai ma faipule ole itumalo o Siumu i le Maota i tausaga ua mavae.
Peita’i e amata ona faai’u le fono ae tulai le taitai o le ituagai, Tuilaepa Sailele Malielegaoi e faailo le toe taliu mai ma le manuia o lana siiga gasegase, sa momoli ai lana faafetai ile tapuaiga ma talosaga, aemaise o lana faaafetai ile Minsita o le Soifua maloloina.
Ua taatia atu ai nei le pili toe teuteu lea i luga o le laulau a fono a le palemene O SE TULAFONO e teuteu ai le Tulafono o Sootaga Va Lelei o Leipa ma Galuega.
E toe feiloa’i ai le Palemene i le Aso Faraile 29 Aperila 2022.
