Na toe tuli ese e alii ma faipule o le afioga o Toamua le tama sa masani ona nofo i le fanua umia saoloto i Toamua uta.
O le tama lea sa loka e leoleo ile masina talu ai, ina ua osofai e leoleo lona fale ma maua ai fualaau faasaina , laau malosi, ma tupe.
Na maua faatasi atu foi iai ma ana paaga.
Peitai sa taofia i le falepuipui i lalo ole vaiga a leoleo , ae ua tatala i tua e talia ai le taimi o le faamasinoga, ma poloaia e taumamao mai Toamua uta, ae nofo pea i lona aiga ma aua nei toe fesoota’i i ana paaga , na maua faatasi i Toamua, aua foi le latalata iai.
Ae ole Aso FAraile na te’a nei na toe maua atu ai e alii ma faipule o Toamua lea tama, ile lotoa na maua ai e leoleo i Toamua uta.
Sa fesiligia e le nuu le tama, lea i lona soli ole latou tuutuuga poo le maliega na faia e Toamua ma leoleo. Ole faasa ona toe oo ane lea alii i Toamua.
Peita’i na ta’u e le tama lea ile nuu, na avatu e leoleo le faatanaga e alu ane ai e piki atu lana taavale mai le fanua.
E le’o iai se talitonuga o le nuu e mafai e leoleo ona latou faia sea ituaiga o faaiuga, ae o loo iai le poloaiga ale faamasinoga.
E le’i maua se fesootaiga ma le Komesina , ia Auapaau Logoitino Filipo, peita’i o le’a toe tuliloa e au Ata mua le taotoga o lea mataupu i le va o le nuu ma le aiga, ae o leoleo ile va ma le faamasinoga.
