Tala toe tuliloa, mai Savaii, o loo manuia uma le uta a le Vaa ole MV Fasefulu lea na pa’ulia ile aloalo o Salelologa ile aoauli ananafi Aso Gafua 21 Aukuso.
Ile tala mai le ofisa o leoleo i Tuasivi, ina tatou fesootai atu iai, ma faaapea mai, ua tuta ai ile uafu. Sa avane i uta tusa o le fitu ile afiafi ananafi.
Na pa’ulia le MV Fasefulu i lana malaga ole 12 atu i Mulifanua mo Salelologa, peita’i e le’i maua mai se tala mai le pulega ole faalapotopotoga vaa, Samoa Shipping Corporation ise mafuaaga ole faaletonu.
Peita’i sa la’u ese ai lava le pasese ile aoauli ananafi, ae to’alia ai le vaa ma lana uta o taavale na tumu ai.
O pasese na malaga mai le vaa lapoa mai Savaii mo Upolu na latou lipotia le faaletonu. Ae o pasese sa talia mai le taunuu atu a le MV Fasefulu e malaga mai ai ile malaga o le lua mai Savaii, na latou molimauina foi le faaletonu. Peita’i e leai se tasi na aafia, vagana ai taimi o pasese ae o a latou taavale ua le fetaui ma fuafuaga ona ole tulaga le maalofia ile Vaa.
Ae o ta’ua mai e le Ofisa o leoleo i Tuasivi, na tuta ane lava ile tusa o le 7 ile afiafi le MV Fasefulu i le uafu i Salelologa.
