Tuua e Moemoana Samoa mo le tauvaga tausala o le Pasefika 2024

SHARE NOW

E atoa ile tausaga lenei le 37 tausaga talu ona faia le tauvaga tele o le sailia o se tausala o le Pasefika talu mai le tausaga e 1987.

Ma ua sauni ma tapena foi le tausala o Samoa le tamaitai ia Moemoana Sa’afāto’a Schwenke e tau’ave le tagāvai o Samoa mo lea fa’agatama fa’avāomālō.

E to’afitu lalelei mai atunu’u ‘ese’ese o le Pasefika, ua sauni e tauvā e sa’ili ai se Lalelei o le Pasefika 2024 – 2025, e sui tulaga i le Tausala o le Pasefika 2023 – 2024 iā Josie Nicholas mai Papua Niu Kini.

O lea fa’amoemoe tele o le a fa’ataunu’uina i le Aso Sa, 28 Iānuari 2024 se’ia o’o atu i le Aso To’ana’i, 04 Fepuari 2024.

O Tausala o le a tausiniō, e mai atunu’u o Tonga, Papua Niu Kini, Marshall Island, Amerika Samoa, Palau, Nauru fa’apea ai ma Samoa.

Peitai o le aso ananafi, na fa’alauiloa aloā’ia ai le lava tapena o le Tausala o Samoa i le feiloā’iga ma Tusitala ma le Aufa’asalalau;

Ma ia saunoa iai o lenei faamoemoe e le mo nao ia ae mo Samoa atoa, ma tamaitai Samoa, aua o se avanoa taua lenei o le a mafai ai ona faaleo lagona, o aafiaga ma suiga o lenei soifuaga i atunuu eseese o le Pasefika.

Ua ta’utino le Tausala o Samoa, o le a tu’u atoa lona mafai, lona silafia ma lona tomai, e fa’atino ai le fa’amoemoe i le mauāluga e gata ai, auā se ai mo Samoa.

O le Kamupanī Telefoni a le Digicel o lo’o latou lagolagoina, taumafaiga a le tatou Tausala o Samoa mo lea fa’amoemoe tele.