Ole afioga i le Sui Palemia, Tuala Iosefo Ponifasio ua sui tulaga ai nei i le afioga i le Palemia, Fiame Naomi Mataafa, i le taimi atoa ua tuua ai le atunuu e le afioga i le Sa’o Faapito, Fiame Naomi Mataafa.
Ma faamaonia mai e le afioga i le Taitaifono ole FAST o le Minisita sinia o le Kapeneta, afioga a Laaulialemalietoa Polataivao Leuatea Polataivao Fosi Schmidt ina ua tatou fesiligia.
Ole Aso Sa 5 Iuni lea ua malaga ai le afioga ile tamaitai Palemia i fonotagata faalevaolemalo mo le tolu vaiaso, e ui atu i Fiti, Niusila mo le fono tele a ta’ita’i o malo o le lalolagi i Aferika.
Ua talosagaina mai le taua o lona auai atu. O loo malaga faatasi ma le Failautusi a le Kapeneta ae ole Ofisa sili o le Matagaluega a le Palemia, Agafili Shem Leo ma le Ofisa sili o le Matagaluega o le Va i Fafo.
Maitauina o le taimi muamua lea ua malaga ai le afioga ile Palemia i atunuu mamao, talu ona tula’i mai lana faigamalo a le FAST ile faafoeina o le malo tutoatasi o Samoa, i le uma ane ai o sauniga na tatala aloaia ai le tausaga atoa e sami ai le tutoatasi lona 60 o Samoa.
