Ua faamuta faafuase’i ma aveese atu i fafo ma Samoa tama’ita’i misionare e toatolu na faafefe ma faamata’u e fasioti e le alii Samoa sa taumafai e faamata’u ma faamalosi, i latou ile fale na nonofo ai i Vaitele ile Aso 24 o Aperila ole tausaga nei.
Na ioeina e Lui Poka Saveu ona moliaga, ile masina na sosoo ai, 27 Me, e aofia ai moliaga e lua ole taumafai e faia se fai aiga faamalosi, tasi le moliaga ole gaoi, tasi le moliaga ole talepe fale ma le loto iai, tasi le moliaga ole faamata’u e fasioti, tasi le moliaga ole umia ole aupega matautia.
O solitulafono a lea alii, e tusa ai o faamaumauga a leoelo, na faamauina ile faaiuga a le faamasinoga, o iai le latou kopi.
Na amata le soligatulafono a lea alii mai le afiafi ole latou taelega ma ana uo, ma faasuaava ai, ma ia gaoia ai le ki ole taavale ma sola ai.
Ae ole osofaia ai ole maota na tofafa ai tama’ita’i misionare e toatolu, i lea po, na sao i totonu ma le fasi u’amea, ose vaaiga na matatau ai i latou ma fememea’i, ile atu telenoa ae fusi lona ulu.
Ole toe aluga o lea alii i fafo ma le potu na loka ai loa e teine le faitoto’a, ma poloka ile moega, ae vili leoleo.
Ma tali vave ane leoelo ile valaau ma maua atu lava lea alii oloo autilotilo i teine ile tama’i pu ole potu ma faafiafia ai lona tagata.
Ma amata le faatatau a le faamasino i lena solitulafono faamaonia, ile valu tausaga, aveese le 30%, 32 masina o lona vave ioeina ole moliaga.
Na taua foi e le pulenuu, le faasala ai ile $1,000.00, peita’i e le taulia ai le tupe lena, ile ifoga, ana ave ose vaega ole ifoga, e maua ai se isi pasene toese mai lona faasalaga.
Peita’i ole lipoti a lana ekalesia na maua ai lesi faamāmā avega i lana sala, i ona itu lelei.
Ma taunuu ai le faamasino, Chief Justice Perese ile faasalaga, 4 tausaga ma le tolu masina, aveese ai taimi na taofia ai, ma ua poloaia ai ele faamasino le tuu ole igoa o lea alii ile Sexual Offenders Register.
