Na ioe le alii talavou ia Suti Leato Fau , 24 tausaga o Faleula i lona moliaga o le faaoolima tuga.
Ole mataupu lea na maitauina ai e le Faamasino ole faamasinoga Maualuga, Justice Vui, le faaoolima o Fau i se alii 50 tausaga i Faleula ia Aukuso o le tausaga talu ai mai se inuga ile fagumalosi o le Rova Voka.
I faamaumauga a leoleo, o le na aafia sa inu faatasi ma Fau ma isi alii e toalua, na tu’i e Fau ina ua le avatua le ipu ia ia. Na tau ile gutu le tui ma matapogi , ma ave ai ile fale.
Ae na ala a’e ma toe o ma lona atalii ile taxi ile fale o Fau, ma sa le tatau ona tupu pei ona ta’ua e Justice Nelson.
Na fusu le to’alua lea ma toe aafia ai le tama 50 tausaga ma ave ai ile falemai, togafiti ma ave i le fale, mulimuli ane na toe ave foi ile falemai togafiti ma manuia.
Ua maitauina foi e le faamasinoga, le aualii lea e to’alua, ua la iloa mai le faaletonu na tupu, o le avamalosi e le’o se mea mo la’ua.
Peita’i ose tala fiafia i le Faamasino, faamaumauga ma tala, o Fau ua le toe inu. Saunoa Justice Nelson: O lana tala lea e fai pea i tagata inu e oo atu i le faamasinoga, a le mafai ona inu ma le faautauta, aua le toe inu.
Na tele le sao o le faatoesega a Fau ma lona lagolago i le na aafia ma le auai i polokalame toe fuataina.
Lelei foi lona lipoti mai le Vaega o Nofo vaavaaia, moliaga muamua lea, ma ua tuli lona ono vaiaso i le polokalame faapitoa a le Salvation Army.
Ua leai se faasalaga falepuipui o Fau ile mataupu lea, ae a le tuufautuaina ma toe soli le tulafono, poo le avamalosi poo se lava mafuaaga, o le’a alu loa ile falepuipui i Tanumalala.
Ae ua tuu iai le ono masina e nofo vaavaaia ai, ma aiaiga faapitoa e lua, 100 itula o galuega mo le lautele, ma aua nei toe inu ise avamalosi e aofia ai ma le pia pu lu ile fale. .
Ua faamauina foi e le faamasino, Justice Nelson, aafiaga faauaua o tatou talavou mai le fagumalosi lea o le Rova.
Taimi nei, ua poloaia e le Komiti faatonu o le Ava Malosi, le faasa ai ona toe gaosia le fagumalosi o le Rova i Samoa, mo se taimi.
