Sa vaaia le laumata fiafia ma le faagaeetia ise feiloaiga ma uo ma e masani ale Faalapotopotoga ole Samoa La’ala’a ise inuga ti faalemasina ma sa faapea ona tuuina atu ai ma la latou meaalofa tupe mo tama ma tina matutua I Mapu i Pulotu I Savaii e tusa male 10.000 tala lona aofai.
O le Samoa La’alaa ole vaega o uo ma aiga e fiafia e faamalositino savavali I taeao taitasi ma o se tasi o a latou talatalanoaga faasamasamanoa na afua ai se manatu e fia fai so latou sao ile nofoaga fou o tina ma tama matutua I Mapu I Pulotu.
O lenei foai e tuuina atu e fesoasoani ai I le galuega o loo faatinoina le fausiaina mo Tina ma Tama matutua i Savaii ina ia faaitiitia ai le tau oo mai I Upolu mo lenei auaunaga o loo faapena ona faatinoina i Mapu i Fagalele.
O le susuga ia Leatigaga Peni Tofa sa fai ma sui o le Mapu I Pulotu na te taliaina lenei fesoasoani, sa tauaaoina e le Afioga I le Minisita o Tina ma Tamaitai, Atiinae o Nuu ma Agafesootai Hon Leota Laki Lamositele Sio e fai ma sui o le Samoa La’ala’a ona o ia foi o se tasi o le vaega ale Samoa La’ala’a.
O lenei faamoemoe sa faatinoina ile fale talimalo ole Hotel Elisa ma sa saunoa manino ai le Afioga ile Minisita ile taua o lenei foai ale Samoa La’ala’a e fesoasoani ai i e o loo lima vaivai ma fia maua le fesoasoani.
I le taliaina ai o lenei foai taua, sa saunoa manino ai foi le susuga ia Peni Tofa e talia aloaia ai foi le Samoa La’ala’a e avea ma paaga faaauau ale Mapu I Pulotu mo le agai i luma ma ia momoli mai ai le agaga faafetai ona o lenei meaalofa taua.
E momoli atu le faafetai ale Samoa La’ala’a i aiga, faalapotopotoga, uo ma e masani ma I latou uma na fesoasoani mai I lenei faamoemoe taua.
