E mulia’i le oo poo valevale alofa o taitai ole Pasefika i Aotearoa, ile tuumalo ole afioga ile Tupu o Maori, Tuheitia Pootatau Te Wherowhero VII ile vaiaso nei, ae na tamua ile faaiuga ole masina o Aukuso, le feau faamaise ma faamafanafana ile ao mamalu ole malo tutoatasi o Samoa, Afioga a Tuimalealiifano Vaaleto’a Sualauvi ll.
O lana tusi faamaise, e fai ma sui ole malo o Samoa ma ona tagata, e lagona faatasi ai le faanoanoa ona ole tuua ole malo e le tupu o Maori, o Niusila, aemaise o tagata Maori Niusila.
Ua 18 tausaga ole nofoaiga a King Tuheitia, na iloga lona sao ile aumaia faatasi o tagata Maori i suiga o aso nei ile lalolagi. Sa ia finau mo le filemu ae ole lumanai saogalemu o tagata uma. O lona tuumalo, ua lagona ai e Niusila ma Maori atoa faanoanoaga.
Peita’i ile faamaisega faaleaganuu a Samoa ile tu’umalo ai ole Tupu Maori Tuheitia Pootatau Te Wherowhero VII Turangawaewae, na molimauina le maeu o tapenaga a taitai ole Pasefika i Niusila, ma saunoa aloaia ai le susuga Teleiai Edwin Puni e fai ma leo, ole auala paia sa latou faatino, ile siusiu launiu, ae ole lauga na ta’u atu ai le faamaopopo aiga o Samoa, ose vaega o lana agaifanua, ole faaaloalo ma le sii alofa, ae ole tuufaatasia ai o taitai o ekalesia Samoa i Aotearoa, i ona faafeagaiga e fia.
