Mai ise pepa o faamatalaga mai ile itulau a le Soifua Maloloina ua faamauina ai le faamutaina lea ole pepesi ai ole fa’ama’i ole Fiva Ponaivi.
I faamaumauga a le Matagaluega ole Soifua Maloloina ile vaiaso na te’a nei e na ole ono gasegase ole Fiva Ponaivi na faamauina e le auaunaga a le soifua maloloina, ma ua faaitiitia ai le numera o tagata i Samoa na aafia ile dengue fever lea e mafua atu i u a le namu.
Ile faasilasilaga faalauaitele talu ai nei a le Matagaluega ole Soifua Maloloina le faamuta poo le mae’a ai ole pipisi o lea fa’ama’i i lo tatou atunuu, lea sa amata aafia mai ai Samoa ile masina o Oketopa ole tausaga na te’a atu nei.
E oo atu ile 496 le aofai o i latou na faamauina i faamaumauga talu ona pepesi ai lenei fa’ama’i ma faamauina ai le maua ai o Samoa i lea gasegase ae pau le vaega e lelei ai e leai se soifua o maimau ai.
Ua momoli le agaga faafetai a le Matagaluega ole Soifua Maloloina ile lagolago a le atunuu ile tusitusia o lapata’iga mo le puipuiga ile faamamā o nofoaga e nonofo ma tau tuufua ai le namu, faapea le fesoasoani ifo ile Matagaluega ile fanaina o nofoaga sa pito maualuga le numera o tagata na aafia ai i lenei fa’ama’i.
