Ua fa’aleaogāina ma ave i tua e le Fa’amasinoga o Apili le talosaga apili a le Fofoga Fetalai’ le afioga ia Papalii Lio Taeu Masipa’u e pei ona faaulu i le faamasinoga i le Aso 18 o Oketopa 2022
O se faaiuga ua leva ona faatalitali uma iai le toatele ole atunuu, ile talosaga a le Fofoga Fetalai e faasaga ile faaiuga a le Faamasino Sili, Justice Perese, na ia poloaia ai le toe foi o faipule a le HRPP, ile palemene, le susuga ia Tuilaepa Sailele Malielegaoi ma Lealailepule Rimoni Aiafi, ma ia maua o la totogi.
O le faaiuga lena a le Faamasino sili na teetee iai le Fofoga Fetalai, ma talosaga ai e toe iloilo, ma sa talia, ma iloiloina e faamasino e toatolu mai fafo.
Ae o le mataupu lea na ala ona toe oo ile faamasinoga, talu ai sa faamaonia e Justice Perese, moliaga faasolitulafono o faipule e toalua o ta’ua i luga, ile Contempt of Parliament.
Ma toe faasee ane ai le mataupu ile Maota ina ia toe taga’i i lana faaiuga sa faia ile faasalaga o faipule, sa faamalolo ai e leiloa se taimi e toe a’e ane ai.
Peita’i o iina na usitaia ai e le Fofoga Fetalai le poloaiga a le Faamasinoga ma ia faavae ai loa le taimi e lua tausaga ole faasalaga o faipule ia, e aunoa mani o la totogi, ma faamanuiaga faafaipule.
Mulimuliane ua toe apili e Tuilaepa ma Lealaipule le faaiuga lena ale Fofoga fetalai, ma toe oo atu foi ile faamasinoga maualuga, ma faai’u ai e Justice Perese e solitulafono le faaiuga a le Fofoga Fetalai.
Ae ia toe foi atu faipule ile maota ma ave iai o la totogi.
Ole faaiuga lena a Justice Perese lea na toe apili ele Fofoga fetalai, pei ona iai ile tausaga ua mavae i luma o faamasino mai fafo, ae uma ane lau mai na’o faaiuga o isi mataupu, ae sema se taimi ole faaiuga ole mataupu lea, o loo talitali uma iai le toatele ole atunuu.
Peitai o lea ua manino mai i le aso le faaiuga a le faamasinoga ua faaleaogaina ma ua ave i tua.
