Ua ta’imua ai matai ma faiupu o le afioaga o Safotu i Savaii i lenei tausaga e toe lalaga ma faamanatu i le lautele le taua tele o le taofia o sauaga e faasaga i tina ma tamaitai ae o fanau.
Ma maitauina ai i le Aso Toonai o le faaiuga o le vaiaso le ofaga potopoto o ona pitonuu poo vaega e ono sa vaevae iai, e aofia ai Manase, le komiti a tinā ole masina oso, ole komiti a tinā ole FOTU-O-SAMOA, ole falelua a Safitu ma Safee, ole falelua a Sa Laveā ma Niutili, male falelua a Lepolo ma Sa Fuāmua.
Na tofu sao uma ona itutino uma e aofia ai foi ma le Komiti tele a tina ma tamaitai o le afioaga, e faaleo lo latou foi lagona pe a oo sauaga e faasaga i lo latou itupa.
Ae e lei tuumama ina foi e itupa o matai ma le aumaga o le malosiaga o le afioaga i a latou siva faitaga, o pese ma tala faatino e sootaga uma i le autu e tasi o le taofia o sauaga.
O se tasi o a latou tala faatino na momoli mai ai se aoaoga tāua i ulugalii ua maea ona tuufaatasia ile sakalameta ole faaipoipoga, ae uma ane tutupu ai sauaga i lo la aiga.
Aemaise ai ole tōsina gofie ole loto ose tamaitai ise tama e late faaipoipo ae uma tutupu ai faafitauli i tua atu ole la aiga.
E tasi lava le faamoemoeaga o le afioaga o loo i tua o nei polokalame ia aua nei tutupu sauaga i totonu o lotoifale o aiga taitasi o Safotu, ae ia galulue faatasi mo se lumanai manuia o alo ma fanau lalovaoa.
O le itumalo o Gagaifomauga 1 e iai Safotu ma Manase lea sa faatinoina le polokalame o le taofia o sauaga o tina ma fanau.
