Pe malo pe faiaina i le ipu o le lalolagi i lakapi liki le Toa Samoa, ae ua faapine lona manumalo i agaga ma fatu o fanau aoga maualuluga a Samoa.
Aemaise ole lua vaiaso talu ai sa fetaua’i tamaiti aoga ma oo ai ina tapunia mose taimi le tumau ae soalaupule pulega.
O se faafitauli ua faitau tausaga o taumafai le Matagaleuga Aoga Taaloga ma Aganuu, ma matua e taofi ma faagata ‘aua nei toe tupu, ae sa tupu pea.
Peita’i o le vaiaso nei lea ua molimauina ai mo le taimi muamua le sui ole auala ua faafilemu ai nei fetauaiga a fanau a’oga.O fetauaiga ia na oo lava ina molia ai nisi o alii aoga ile umia o a’upega, poo maa.
O le faafilemu lea ua to’a mai ai, o le faatino lea ole fealofaniga mo le tapuaiga o le Toa Samoa ia manuia.
Ia ave iai le lagolago, a le kolisi o Leififi ma le kolisi o Sagato Iosefo.
O le to’atuga ua umi o taumafai e aveese i taimi o taaloga a aoga, aemaise o lakapi, ua loa tausaga o fefulisa’i e puleaoga ma faiaoga, ni auala e taofi ai le toe tupu .
Peita’i o le manuia o taaloga a le Toa Samoa i le ipu o le lalolagi, ua fai lea ma sao tele i agaga ma fatu o isi ia Toa Samoa o le lumana’i, ma faaali le latou lagolago, ae ole faaleleiga i luma o le Atua mo Samoa ma lana tapuaiga o le Toa Samoa.
E ala le latou Haka faapitoa e ofo atu ai o latou taimi ma le lagolago fai faatasi, e tapua’i le taaloga a le Toa Samoa ma Ausetalia ile vaeao o le Aso Sa, a sau nei i Peretania.
