Na maeu le talimalo ma le lagolago a le Ekalesia Metotisi i Satapuala i le Aso Sa ananafi, Tatou molimauina le faatumulia uma o nofoa o le malumalu, e le gata i le afioaga lava latou, ae o malo asiasi atu, a le pulega o Tulisi a Samoa, ma latou tamaitai tauva o le Pasefika.
O le lotu Metotisi i Satapuala na amata aloaia mai ai le polokalame vaiaso atoa a tamaitai, i lenei vaiaso, mole tauvaga tele i le po o le Aso Faraile ole vaiaso nei.
Ua malaga atu i Savaii i le vaa ole valu i le taeao, ma latou asia le maota o tina ma tama matutua i le Mapuipolutu e faatino ai le Ava o le Feiloaiga ma faasolo ai le asiasiga i le nofoaga o gaosia ai siapo i Savaii, ae o le vaitaele i Vailoa Palauli le Afu aau. I le afiafi nanei, e faia ai faataitaiga i le Stevensons i Manase, ae malolo ane i le La Goto i Fagamalo i le po nanei.
Ma toe faasolo ai le asiasiga i le Mataaga ole Lava i Saleaula, ma tuli ane le vaa o le 12 mai Savaii, e toe taliu mai ai i Upolu a taeao, Aso Lua 31 Ianuari 2023.
Afiafi ole Aso Lua taeao, ile ta o le ono, le faa afe a le Taita’ifono, i le Friendship Park.
O le Aso Lulu e asia ai le Maota o tama ma tina matutua i Mapuifagalele, i Vailele i le 9am.
Aso Faraile Taavale teuteuina i le 9am, ae po loa le tauvaga tele i le fale taalo i Tuana’imato amata i le 7pm.
E fa motu o le Pasefika ua mafai ona gafatia mai le tauvaga o lenei tausaga talu mai le tolu tausaga ua tuanai ona o le faama’i tele le koviti. Ae i le sauniga lotu ananafi, na auai atu ia , le Tausala Solomona, Amerika Samoa, Nauru, Papua Niukini ma le tamaitai Samoa.
Ole uma ane o le lotu ma faaafe e le ekalesia mo le toonai,malo asiasi atu, e le gata o tausala ae o latou auaiga ma faafeao. Ma faauma ane ai ananafi i le faletalimalo o le Taumeasina, e faatulaga ai numera o tamaitai Tauva .
