Ua tuuina mai nei i luga o Upega tafailagi se faatoesega faalauaitele a le falepasi o le Laumosooi e ala i le faalavelave lea na tulai mai le masina ua mavae, ma maliliu ai tama matutua se toa lua mai Poutasi Falealili.
E atagia mai lenei faatoesega se faamatalaga e faapea, “Lua vaiaso a’o lumana’i le fa’alavelave, sa fa’atū le pasi mo galuega fa’aleleia mo le pasiaina.
“Sa feso’ota’i mai le ave pasi i le Aso Faraile (29/09/23) ua mae’a ona siakiina le pasi i le LTA (Land & Transport Authority) i le aso lava lea
“Sa fa’atonuina fo’i e toe avatu i le Aso Gafua e soso’o ai e toe siaki ai ni mea laiti sa mo’omia ona toe faia, auā e fa’amāe’a le pasia ina o ta’avale i le Aso Gafua, ona faia loa lea ole poloka masani i le Aso Lua e soso’o ai.
“Peitai o le Aso Faraile lava lea na poloa’ina ai le ave pasi ina ia aua le fa’aogāina le pasi se’ia māe’a ona totogi le lesitala pei ona fa’atonuina e le LTA.
“Ae na maua fa’amatalaga i le taeao o le Aso Gafua, ua tupu ai le fa’alavelave,”
Na tulai le ave pasi na faafoeina le pasi nei e le Laumosooi i le amataga o le vaiaso nei i luma o le faamasinoga maualuga ma teena uma moliaga a leoleo e faasaga ia te ia.
Ae i ripoti mai le Pulega o felauaiga i le laueleele e lei iai se laisene o le ave pasi, ma e lei pasia foi le pasi lenei na tulai mai ai le faalavelave.
E toalua ua faamaonia na maliliu i le faalavelave ae 31 le aofia o le pasese na manunua.
