Na taua e le tulisi na iai i lea vai aai, e tupu le mu pe tusa o le 10 ile taeao ole Sapati ananafi, ae na latou iloa atu mai isi fale tulisi e le mamao lava foi ma le pisinisi lea na afaina ile afi.
Pau ole faafetai e le’i sosolo i isi fale tumafataga, aemaise ai lava ole atufalega lea i luga o le sami.
E na’o le tasi lava le fale na aafia ma felelei ifo toega ile sami ma tafia atu ile pito na iai latou, ma ia taulamua ile taumafai e aveese ni vaega e aafia ai tagata ma le siosiomaga pe’a magoto ifo i lalo, pei o fasi laupapa o loo maumau ai fao.
Peita’i na faate’ia ia i lona maua o laupepa o le Tusi Paia, e le’i mu ae na lelea atu ile sami ma opeopea , na ia maua ma fai ai loa latou faitauga tusi paia ananafi ile matagafaga.
O le Aso Sa lava lea e tele ina fai malologa ai o tatou lava tagata Samoa i fale tumafataga mo le faaiuga o le vaiaso , peita’i o le faalavelave lea ananafi, ile molimau mai le ofisa fui ina ua tatou fesiligia, e leai se soifua na maumau ai, ae na oo atu iai le fesoasoani a le Ofisa fui mu.
Na talanoa ai le tatou paaga fai faletalimalo mai Aleipata, ua amata ona faasolo ina toe foi lava tagata tafafao ma tupe maua mai tulisi ina sii i luga.
Ma ua tapena foi latou mo le vaiaso puupuu lenei, e amata ai foi ona tali malo ile afiafi ole Aso Tofi, e oo lava ile Aso Gafua o le Vaiaso fou.
I lana tala o lesi lea taimi ole tausaga e faatalitali iai latou, o Aso malolo o le Aso Maliu, aemaise ai o lea ua toe sologa ina manuia tupe maua mai tulisi, e laiti palalagi, ae ole tele lava o tatou lava tagata e gasolo atu i fale tumafaga mo tafaoga ma malologa
