O le polokalame ile afiafi o le aso Toanai o lea tatala aloia lea i le savali faaaloalo alii ma tamaitai malu o le malo.
Sosoo lea ma le sisiina o le Fu’a o Samoa, Sauniga lotu, Saunoaga faapitoa a le Minisita o Aoga Taaloga ma Aganuu le afioga ia Seuula Ioane, ona faaiu lea i faafifiaga e nisi o au faafiafia ua tapena.
O le isi lea vaega e aofia i totonu o sasa ma faafifiaga o le tapunia aloaia o le 60 tausaga o le tu toatasi o Samoa.
I le feiloaiga a tusitala ma le komiti o Taaloga i Samoa i le aso Tofi o le vaiaso nei, ua faamaonia mai ai e 22 taaloga lea ua mautinoa olea faatino i le vaiaso atoa o lumanai e amata atu i le aso Gafua i le aso Toanai A maea lava le taaloga i lea aso ma tauaao ai lava faailoga poo pine mo i latou olea manumalo mai taaloga taitasi.
Peitai ua faailoa mai e le Ofisa Sili o le Samoa Games le susuga ia Tuala Mathew Vaea, ua faa avanoa mai foi e le SSFA poo le Samoa Sports Facilities Authority le Paka mo le mamalu o le Atunuu e afifio atu e molimauina lea faamoemoe e aunoa ma se totogi.
Tatala foi soo se ofisa faasalalau e fia auai e pue le tatala aloaia ina o le polokalame.
Saunoa Tuala ua iai foi nisi o taaloga olea mafai ona auai mai ai au mai atunuu i fafo pei o le lakapi o loo faasolo nei ma le Volipolo e faia lea i le faletaalo a le Iunuvesite i Vaivase, e auai mai ai au mai NiuSila, Austalia ma Amerika Samoa.
I lea polokalame atoa ua ofo atu ai e le Malo le tinoitupe e tusa ma le $200,000 e fesoasoani e faatupe uma ai le faamoemoe a le Samoa Games 2023.
