Ua alu nei le lua o aso o tau saili lava e leoleo ma le afioaga le tama ia Lafai Lemo o Satufia Satupaitea, na usua’i lana fanotaga poo lana fagaao i le taeao o le Aso Lulu o le vaiaso nei, e oo mai le taimi nei e lei toe foi ane lava.
O le tofa ia Lafai e toalua ona alo, o le alii ma le tamaitai ma e laiti foi.
Peitai i se lipoti mai le tatou paaga faamoemoeina mai le afioaga o Satupaitea, na maua loa e le tina o le aiga ia Taumaoe poo le tausi o le tofa ia Lafai, le le toe foi ane o le tama i uta.
Na ia faananati loa ma logo le nuu mo se laveaiga poo se fesoasoani e ala i le sailia o le tama pei ona taua i luga.
Taua foi e le tatou paaga o loo tatou taofia lona suafa, na amata faatino mai lava le galuega faitoalua a le Matagaluega o leoleo ma le afioaga atoa e aofia ai matai ma taulelea i le aso ananafi, seia oo lava ina malu ae le afiafi.
Ae talu ai o nei le faigataulaga a le latou afioaga, ua na o se vaega la o le nuu lea ua auai ane e toe faaauau le sailiga o le tama i le aso.
O Lafai e tusa ai ma lipoti mai le afioaga, o se tama ua iloga i le faifaiva, ma ua tuufesili le nuu ma nisi o uso faifaiva, pe aisea ua tulai mai lenei faaletonu ae o Lafai o le tagata o le sami, ma o lea foi na alu lana faiva i le ao.
E le o se taimi muamua lenei ua lipotia mai ai ni faaletonu faapenei, i le tausaga lava lenei i le masina o Aukuso lea foi sa saili ai le tama mai le afioaga o Puapua Savaii.
Na iu lava ina faatino le lotu ma faaaloaloga uma e le aiga i tai le matafaga ina ua siliga lava sailiga a leoleo.
