E $124,200 ST le fesoasoani a le malo o Ausetalia na tau a’aoina i le faaiuga o le vaiaso aua tapenaga a ‘au ta’a’alo a Samoa o le a masii atu mo le Olimipeka i Pale Farani i le masina o Iulai 2024.
O lea fesoasoani tauala mai i le lagolago a le Pacific AusSports ma o le a agai tonu lava i tapenaga a auta’a’alo mai fa’agatama eseese e pei o le Lakapi, au siisii uamea mamafa, a’au, alo vaa faila, fusu, pii ma nisi o taaloga.
Peitai faamanino mai e le faiaoga ulu o le Asosi siisii uamea mamafa le susuga ia Tuapepe Jerry Wallwalk o lenei fesoasoani e lē gata i ‘au ua agavaa ae o isi ‘au ua toe taitasi Taaloga e saili agavaa ai mo le auai i Taaloga o le Olimipeka e pei o le lakapi taitoa fitu a alii ma tamaitai.
E ui na faaleo e le failautusi o le Asosi o taaloga a Samoa le susuga ia Maureen Tuimalealiifano le manaoga e 1.2 miliona le tauaofai o le faatupega o le masii atu a Samoa mo Pale i Farani ia Iulai o le tausaga nei aua le faamoemoe, ae o loo taulai lo latou silasila i se isi fesoasoani mai le malo.
O le seleni sa foaina e Ausetalia ua tuuina atu i aao o le Faalapotoptooga o Taaloga a le atunuu le SASNOC mo le amatalia o tapenaga.
