O loo taofia pea e leoleo le Sport Van a le tama ua lata ile 70 tausaga le matua talu mai Tesema o le 2023, o lesi lea taavale na avane e leoleo e su’esu’e pe le’o le taavale lea na lavea ai le alii aoga NUS, ia Tuuau Maletino.
O Tuuau na maliu ile aso 21 Aperila 2021, peita’i na faatoa avane le Sport van lea ile silia ma le lua tausaga mulimuli ane.
Na ta’ua e le tatou paaga mai totonu, ole taavale van lea o loo taofia pea e leoleo, na o leoleo avane, e aunoa mase pepa fataga faletulafono, ae na faatoa faamalieina lena laasaga o suesuega faapea, ile lua aso mulimuli ane.
Peita’i ua le van maualuga, pei ona ulua’i masalomia I suesuega a leoleo na lavea ai Tuuau, ae ua tuuaia ai nei le Noah Sports Van, ituaiga maulalo.
E le’i maua ase tatou tala ma le aiga e ana le tama’i sports Van, ae o ta’ua e le tatou paaga mai totonu, o loo taofia pea e leoleo lena taavale, ona ua tuuaia sa maua ai se toto mai lalo ole taavale lea ina ua ave suesue ise fale inisinia I Lepea, ile taimi na avane ai ia Tesema ole 2023.
E oo mai nei, o lo o teena pea e leoleo le molimau a Samuelu Leau, lea e taofia ai Tanumalala ile taimi nei, i moliaga o lona faia oni tala faalumaluma.
Peita’i o le molimau malomaloa a Samuelu ile tausaga talu ai, lea na afua ai ona toe lalaga ane I luga suesuega o le maliu o Tuuau ua savali ile lua tausaga o to’alia. Ole molimau lena a SAmuelu o loo tuuaia ai le Land Cruiser na ia vaai iai, pu’e ata ma ave i leoleo foliga ole falavelave na tupu I lena po.
Ma faia ai e le Komesina talu ai, le faasalalauga faalauaitele I le aufaasalalau, ua iai le tagata o lo o masalomia ile maliu o Tuuau. Peita’i o lena faalauiloa a le Komesina o leoleo ilena taimi na toe molo’aua e aunoa ma se faamatalaga.
E oo mai nei, e lei maua lava se tala ole suesuega a tagata faapitoa mai Saina, lea na taua ua oo atu le faila ile ofisa o le loia Sili, talu mai lena taimi.
Ae lua tausaga mulimul ane, faalauiloa mai e le Susuga Auapaau Logoitino Filipo, ua uma suesuega a leoleo e le talitonuina molimau a Samuelu.
Ole aso e toe valaau ai le mataupu ile faamasinoga, mo lesi ona laasaga i le mataupu lava lea e sootaga ile maliu o Tuuau Maletino ole NUS ile 2021.
