E maea ane ona toe faatele ma faaleleia le lala o le Faletupe o Tagatanuu o Samoa, le National Bank, i Vaitele na tatala i le amataga o le vaiaso nei, ua atoa foi ma le toa 10 o lana aufaigaluega mai le toa fa sa amata mai ai.
E tolu vaiaso sa faatino ai se galuega o le toe faaleleia o le ofisa ma toe faatelēina, auā le aga’i atu o le mamalu o le atunuu e faaaogaina le auaunaga.
Peitai i vaiaso na sa faatino ai le galuega faaleleia, sa faaaoga e le faletupe taavale poo mobile vans e lua e faatino ai pea le auaunaga mo le mamalu o le atunuu o le la foi faaitu.
E pei ona saunoa le Pule Sili Lagolago o ia foi o le Pule o Tupe le susuga iā Peseta Peter Tone, o se tulaga fiafia ia i latou le Pulega, o le faaleleia atili lea o le auauanaga, ma faafaigofie, auā le gasolo atu o le mamalu o le atunuu.
I le toe tatala ai la o le ofisa i Vaitele, o le a toe agai ai loa van e taamilo i afioaga i tua, e faatino ai le auaunaga, ae maise o le faafaigofieina mo le atunuu o loo tau autovaa mai i Apia poo Vaitele foi.
O le toe tatala ai o le lala a le National Bank i Vaitele o le a toe faaauau pea i taimi masani o le 9 i le taeao se ia oo atu i le 4 i le afiafi mai le Aso Gafua i le Aso Faraile.
