Ua mae’a ma le manuia le fonotaga a le Atoa o Samoa, pei ona taualuga atu ai i Salafai ile Aso Tofi ma tofafa ai le aumalaga i le Itu o tane, ile itumalo o Gagaifomauga numera tasi i Manase.
Peita’i o nisi o mataupu na talanoaina e aofia ai Fefaatauaiga,
1: Pei ona lipotia ai e le faatonu oloa faafetaua’i a Amerika Samoa, Susuga Petti Matila, ile faamatalaga faalauaitele mai le ofisa o le Kovana i Amerika Samoa, i le maeu ole sootaga tau tamaoaiga o Samoa na lua, e aofia ai ma le faaaliga o a la oloa gaosi lava i Samoa.
2: O le faafaigofie ona ofi atu o oloa a Samoa i maketi i Amerika, ma faapaaga ile va ma faipisinisi tumaoti. e aofia ia ma le valaaulia mai ole pulega o Tulisi a Amerika Samoa ile malaga faalauiloa o Samoa na faia i Niusila ma Ausetalia.
3: O tagata faigaluega, ae o tulaga tau femalagaiga, puipuiga o la tuaoi, pei ona lipotia e le Loia Sili, Fainuulelei Falefatu Alailima-Utu le sologa lelei o le Guest Workers Program, ua 1,355, o galulue ai, ma o loo mana’omia lava e le falei’a a le StarKist Samoa nisi tagata. O ta’ua foi e le Fainuulelei, e 400 tagatanuu o Samoa o loo faamaonia ile masina i lalo o le polokalame lea . Ae na ta’ua foi e le Teutupe, Susuga a Malemo Tausaga agaiga o le puipuiga ole tuaoi, ua faaaoga iai ta’ifau sosogi, ma sootaga faapitoa ma Samoa.
4: Auaunaga tau tupe, Na faaali e le Teutupe ia Malemo le lipoti o tupe ile va o Samoa na lua, molimauina ai le siitai o tupe faamomoli talu mai le tausaga o le faama’itele koviti19.
5: Mataupu tau Fesootiga, o taua e le CEO Chuck Leota, le sologa manuia o mataupu tau inisinia o aooga ai le aufaigaluega a le ASTCA a Amerika Samoa, e aga uma lava ile sootaga o fesootaiga televave.
6: Tulaga tau aoaoga, aganuu ma taaloga, ua amata le sootaga i faatalanoaga i taitai o le NUS i mataupu mo faiaoga faapitoa, ae o taaloga lakapi ma isi taaloga.
7: Siosiomaga ma suiga o le tau, ile sootaga ma le Environment Protection Agency EPA a Amerika Samoa, na taua e lona faatonu, Faamao Asalele Jr, e tolu tagata faigaluega a le FESA ua faaiuina toleniga i Amerika Samoa i lalo o le US-EPA. Ma sa asia foi le US-EPA le Ofisa o suesuega faasaienitisi a Samoa, SROS. Sa talimalo foi Amerika Samoa ile fono o faalavelave tutupu faafuasei, na malaga ane ai Minisita o le siosiomaga, Toeulusulusulu Cedric Schuster.
8: Ae mataupu tau i galuega tetele, Transportation & Infrastructure: Port Administration na ta’ua e le faatonu o na Ofisa a Amerika Samoa, Falenaoti Loi-On Fruean ma Faleosina Voigt fuafuaga mo le asiasi atu a le aufaigaluega o le maaevaalele ma uafu a Samoa i Tutuila, mo avanoa e aooga ai mai ai i tomai tau fui mu ma le tali atu i faalavelave tutupu faafuasei.
9: Faatoaga ma Faigafaiva, na taua e le faatonu ia Taotasi Archie Soliai, le faamealofa atu ele Matagaluega ole MAF, a Samoa le 500 tamai faisua, Ma faafetaia ai e le Faatonu o faatoaga, ia Solia Mutini le aveesea o le tapu i luga o fugalaau, laau ma vaega tau i aano o manu, ose laasaga i luma mo atinae faatino ile va o Samoa na lua, ia maua le galulue soosootauau.
10: Soifua maloloina, e aofia ai le faasoa o faamatalaga tau ile tausia o le soifua maloloina, i itu tau puipuiga o soifua maloloina, ae o itu e taunapa iai mo le saogalemu lautele o tagatanuu.
Na afea foi le faasoa o tagata o iai tomai faapitoa faafoma’i, ma ala tausi soifua poo nurses. O le aso e toe taliu mai ai le usugafono mai Savaii, mo toe taliu ai le malo mai Sasa’e. Ae ile tamilosaga o ananafi, na molimauina ai e le afioga i le Kovana sili, Susuga Lemanu Peleti Mauga ma se vaega o lana aumalaga, le gaosiga ole siapo i le afioaga o Siutu.
O le la’ei lea o Samoa o loo faamemelo iai le komiti o tina ma tamaitai ae o le afioaga o Siutu, o lana lea atinae’i e le gata ina faaauaua ai le gaosiga ole siapo , ose agaifanua,a e ua avea foi ose alagatupe mo aiga ole nuu.
Ua lauiloa ai lava Siutu i lana galuega limalima o faia, ole faaolaola mai pea o le gaosiga o le siapo. Ma molimauina e le asiasiga a le Atoa o Samoa.
O aga masani ai lava, i soo se malo e afea se aiga i Samoa aemaise o Savaii o loo tumau ai le aganuu, ole vaimalu, o niu mamata, ae ose faaoso e avagalima ai le toe taliu atu o le malaga i Amerika Samoa e manatua ai pea galuega faaauau ole agaifanua o gapatia ma le komiti a Siutu i Savaii.
