Ua malie Semisi e tulai ia mo ia e aunoa ma se loia

SHARE NOW

E fitu moliaga o loo molia ai le alii o Semisi Aliimatafitafi i luma o le faamasinoga maualuga, e aofia ai le moliaga o le fasioti tagata faamoemoeina, o le fasioti tagata paivalea, umia o se aupega matautia, faapā o se laau malosi, umia o se aupega e lē faatagaina, ma le umia o ututau.

Peitai na ia faaleo i luma o le faamasinoga maualuga i le amataga o le vaiaso nei lona le manao e toe iai se loia e tulai mo ia.

E mafai foi ona ia tulai mo ia lava ma na te ioe i moliaga uma sei vagana ai le moliaga e tasi o le fasioti tagata faamoemoeina e tumau lava lona teena.

E lei teena e le faamasinoga le manaoga o Semiai ma talia ai loa le talosaga a le tamaitai loia sa tulai mo lenei alii ina ia faasee ese mai lona toe tulai ile faamasinoga mo le o loo taua i luga.

O Semisi sa molia ma lokaina e leoleo i le faaletonu lea sa tulai mai i Faatoia i le masina o Aukuso o le tausaga ua mavae, o loo masalomia ai lona faaaogaina lea o se laau malosi e faaoo ai le oti i le isi alii talavou.

Peitai ua toe tuuatu e le faamasino sili le afioga ia Ameperosa Roma lenei mataupu i le aso 12 o le masina fou, sei faamautu moliaga a leoleo ma sei silasila le faamasinoga pe talafeagai le talosaga a Semisi e le manao i se loia e toe tulai mo ia.